Oʻzbek kompaniyasi Afgʻonistonning energetika sektoriga 1 mlrd dollar sarmoya kiritadi

^{Foto: TOLOnews}
Oʻzbekiston kompaniyasi kelgusi oʻn yil ichida Afgʻonistonning energetika sektoriga qariyb 1 milliard dollar sarmoya kiritmoqchi. Bu haqda TOLOnews xabariga asosan Kun.uz ma'lum qildi.

10 oktyabr kuni Afgʻoniston kon va neft vazirligi oʻzbek kompaniyasi (kompaniya nomi tilga olinmagan) bilan Afgʻoniston shimolida joylashgan Jauzjon viloyatidagi Tuti-Maydan gaz konida gaz qidiruvini amalga oshirish va qazib olish boʻyicha shartnoma imzoladi. Bitim «Oʻzbekneftgaz» AJ raisi Bahodirjon Siddiqov ishtirokida rasmiylashtirilgan.

10 yilga moʻljallangan shartnomada oʻzbek investori birinchi yilida 100 mln dollar sarmoya kiritadi, kelishuv muddati davomida umumiy investitsiya miqdori qariyb 1 mlrd dollarga etishi aytilyapti. Dastlabki ikki yilda Oʻzbekiston kompaniyasi Tuti-Maydan konidan qazib olingan gaz hisobidan 100 MW elektr energiyasi ishlab chiqarishni rejalashtirgan.

Afgʻoniston kon va neft vaziri Hidoyatulloh Badri loyihaning muhimligini ta'kidlab, Tuti-Maydandagi gaz zaxiralari taxminan 7 ming kvadrat kilometr maydonni egallashini ma'lum qildi. Tashabbus mamlakatning energiya ehtiyojlarini sezilarli darajada qondirishi, milliy daromadni oshirishi va yangi ish oʻrinlari yaratishi kutilyapti.

Oʻzbekiston prezidentining Afgʻoniston boʻyicha maxsus vakili Ismatulla Ergashev Afgʻonistonning iqtisodiy ahvolini yaxshilash va ishsizlik darajasini pasaytirishda bunday loyihalar muhimligini ta'kidlab oʻtdi.

«Biz millionlab afgʻonlarga ish oʻrinlari yaratish uchun Afgʻonistonning iqtisodiy salohiyatini ochmoqchimiz. Maqsadimiz mamlakatning iqtisodiy tiklanishini qoʻllab-quvvatlash va aholisining hayot sifatini oshirishdir», - dedi Ergashev.

Avvalroq, Oʻzbekistonning neft va gaz sektorida xizmat koʻrsatuvchi Eriell Group kompaniyasi Afgʻonistonning neft konlarini oʻrganishga qiziqish bildirayotgani xabar qilingandi. “Zamin” yangiliklarini “Telegram”da kuzatib boring