Olaf Sholts va Volodimir Zelenskiy Berlinda uchrashdi

^{Foto: Ebrahim Noroozi/ASSOCIATED PRESS/picture alliance}
Germaniya kantsleri Olaf Sholts 11 oktyabr, juma kuni Ukrainaga Gʻarb hamkorlari tomonidan va'da qilingan 1,4 milliard evro miqdoridagi keng koʻlamli harbiy yordam haqida eslatdi. «Germaniya Ukraina tomonida qat'iy turishda davom etmoqda», dedi Sholts Berlinda Ukraina prezidenti Volodimir Zelenskiy bilan uchrashuv oldidan.

Yangi yordam paketi havo mudofaa tizimlari, artilleriya va dronlarni oʻz ichiga oladi, dedi federal kantsler. Uning soʻzlariga koʻra, Ukrainaga qoʻshimcha yordam berish Rossiya prezidenti Vladimir Putin uchun muhim «signal» boʻlishi kerak. «Vaqtga oʻynash ish bermaydi, biz Ukrainani qoʻllab-quvvatlashimizni susaytirmaymiz», dedi Germaniya hukumati rahbari. Ushbu yordam Evropa Ittifoqining Moskvaga qarshi urush boshlagani uchun sanktsiyalari doirasida muzlatilgan Rossiya aktivlaridan tushgan mablagʻdan Evrokomissiya tomonidan moliyalashtiriladi.

Sholts, shuningdek, Rossiya Ukrainaning navbatdagi «tinchlik sammitida» ishtirok etishi kerakligi haqidagi fikrga qoʻshildi. Shu bilan birga, u Ukrainada tinchlik «faqat xalqaro huquq asosida» amalga oshirilishi mumkinligini va Germaniya «Rossiya tomonidan belgilab qoʻyilgan tinchlik shartlarini qabul qilmasligini» ta'kidladi.

Zelenskiy Londonda Starmer va Ryutte bilan uchrashdi

Ukraina prezidenti Volodimir Zelenskiy Londonga tashrif buyurdi. 10 oktyabr kuni u Buyuk Britaniya bosh vaziri Kir Starmer va NATOning yangi bosh kotibi Mark Ryutte bilan uchrashdi. Maslahatlashuvlar davomida Zelenskiyning Rossiya Federatsiyasi bilan urushda Ukraina uchun «gʻalaba rejasi» muhokama qilindi, dedi Starmer.

Birinchi uchrashuv Buyuk Britaniya bosh vazirining Dauning-stritdagi rasmiy qarorgohida boʻlib oʻtdi. Unda Starmer va Zelenskiydan tashqari Buyuk Britaniya mudofaa vaziri Jon Xili, Bosh shtab boshligʻi Toni Radakin va Starmerning milliy xavfsizlik boʻyicha maslahatchisi Tim Barrou ishtirok etdi. «Ukrainani qoʻllab-quvvatlashga qat'iy sodiqligimizni namoyish etish muhim», dedi Britaniya bosh vaziri. Uning soʻzlariga koʻra, Zelenskiy bilan Londondagi muzokaralar Ukraina gʻalabasi rejasini batafsil koʻrib chiqish va muhokama qilish imkonini berdi.

Ryutte Tramp haqida tashvishlanmaslikka chaqirdi

Ikkinchi yigʻilishda 1 oktyabr kuni Yens Stoltenberg oʻrniga NATO rahbari etib tayinlangan Mark Ryutte ishtirok etdi. Uning soʻzlariga koʻra, endi gap nafaqat Ukrainaga yordam berish, balki «Gʻarbni himoya qilish va xavfsizlikni qanday saqlash» haqida ham bormoqda. Shu bilan birga, mudofaa alyansining yangi rahbari AQShda Donald Trampning yangi prezidentlik muddati boshlangan taqdirda ham Ukrainani qoʻllab-quvvatlashga tahdid yuzaga kelishini kutmayotganini bildirdi. Londonda Zelenskiy va Starmer bilan boʻlib oʻtgan muzokaradan soʻng u jurnalistlarga «Tramp prezidentligi haqida qaygʻurishni bas qiling» dedi.

Ryutte boʻlajak prezidentlik saylovlarida respublikachilardan nomzodni yaxshi bilishini ta'kidladi. «Bilaman, u Ukrainadagi bu urush nafaqat Ukrainaga, balki Amerika Qoʻshma Shtatlarining xavfsizligi va kelajakdagi xavfsizligi bilan bogʻliq ekanini mutlaqo tushunadi», — dedi Niderlandiyaning sobiq bosh vaziri. U, shuningdek, AQSh Kongressidagi har ikki partiya Ukraina bilan birdam ekaniga ishora qildi. “Zamin” yangiliklarini “Telegram”da kuzatib boring