Sholts Putin bilan muzokaralar olib borishga rozi boʻldi

^{Foto: AFP}
Germaniya kantsleri Olaf Sholts Rossiya prezidenti Vladimir Putin bilan Ukrainadagi mojaroni hal qilish mavzusini muhokama qilishga tayyorligini tasdiqladi.

“Rossiya prezidenti bilan ham gaplashamizmi, degan savolga, ‘ha, shunday’, deb javob beramiz”, dedi Sholts parlamentdagi chiqishida.
Bundan tashqari, u mojaroni hal qilish uchun aniq tamoyillarga amal qilish zarurligini ta'kidlab, har qanday qaror Ukraina ishtirokida, shuningdek, Germaniyaning hamkor davlatlari kelishuvi bilan qabul qilinishi kerakligini qoʻshimcha qilgan.

Avvalroq Sholts Ukrainadagi mojaroni muhokama qilish maqsadida Moskva ham, Kiev ham ishtirok etadigan tadbir oʻtkazish uchun sharoit yaratish kerakligini ta'kidlagan edi.

Die Zeit nashri Sholts deyarli ikki yil ichida birinchi marta Putin bilan toʻgʻridan toʻgʻri gaplashmoqchi ekanligi haqida xabar bergandi. Hukumat doiralariga koʻra, telefon suhbati noyabr oyida Braziliyada boʻlib oʻtadigan G20 yigʻilishi oldidan rejalashtirilgan. 8 oktyabr kuni Germaniya hukumatidagi manba buni Reuters agentligiga tasdiqlagan.

Sholts, shuningdek, Ukraina mojarosiga barham berish mavzusini muhokama qilish vaqti kelganini aytgan. U Ukraina boʻyicha ikkinchi sammitda Rossiya ishtirok etishini ma'qullashini qoʻshimcha qilgan va shu masala yuzasidan Ukraina prezidenti Vladimir Zelenskiy bilan ham gaplashgan. “Zamin” yangiliklarini “Telegram”da kuzatib boring