Xitoyda 83 mlrd dollarlik oltin zaxirasi topildi

^{Foto: Xinhua}
Xitoyning Xunan provinsiyasida yirik oltin koni topildi. Bu haqda provinsiyaning Geologiya boshqarmasiga tayanib Xinhua agentligi xabar berdi.

Qayd etilishicha, geologlar Pinszyan uyezdidagi Vangu konidan 2 ming metr chuqurlikdan 300 tonnaga yetadigan oltin zaxirasini aniqlagan. Mutaxassislarning ta’kidlashicha, 3 ming metrdan ortiq chuqurlikda esa oltin zaxirasi ming tonnadan oshadi. Ushbu hududdagi qimmatbaho metall qiymati 600 milliard yuanni (83 milliard dollarga yaqin) tashkil etmoqda.

Rudalarni qidirish bo‘yicha ekspert Chen Julinning so‘zlariga ko‘ra, burg‘ilangan ko‘plab tog‘ namunalaridan oltin izlari topilgan. 2 ming metr chuqurlikdan qazilgan bir tonna ruda maksimum 138 gramm oltin saqlagan.

Vangu konida 3D-geologik modellashtirish kabi rudalarni aniqlashning yangi texnologiyalaridan foydalanilgan.

Xitoy dunyodagi eng yirik oltin qazib oluvchi davlatlardan biri hisoblanadi. Oltin bo‘yicha jahon kengashi ma’lumotlariga ko‘ra, 2023 yilda butun dunyoda ishlab chiqarilgan oltinlarning salkam 10 foizi Xitoy hisobiga to‘g‘ri kelgan.

Eslatib o‘tamiz, o‘tgan yili O‘zbekiston dunyodagi eng yirik oltin ishlab chiqaruvchilar orasida o‘ninchi o‘rinni egallagan. 12 oy davomida O‘zbekistonda 119,6 tonna qimmatbaho metall ishlab chiqarilgan. Eng ko‘p oltin ishlab chiqargan mamlakat Xitoy bo‘lgan — 378,2 tonna. Ikkinchi o‘rinda — Rossiya (321,8 tonna), uchinchi o‘rinda — Avstraliya (293,8 tonna). “Zamin” yangiliklarini “Twitter”da kuzatib boring