Angela Merkel Trampning saylovdagi g‘alabasidan xafa bo‘lganini tan oldi

^{Foto: Rg.ru}
Germaniyaning sobiq kansleri Angela Merkel AQSH prezidentligi saylovlarida respublikachi Donald Tramp g‘alaba qozonganidan qayg‘uda ekanligini aytdi.

Spiegel jurnaliga bergan intervyusida u saylovda demokratlar nomzodi Kamala Harrisning g‘alabasini kutganini aytdi.

"Men juda afsusdaman. Demokratlardan nomzod bo‘lgan Xillari Klintonning 2016 yilda g‘alaba qozona olmagani hafsalamni pir qilgandi. Bu safar ham kutganim bo‘lmadi. Men boshqacha natija bo‘lishini xohlagandim", dedi Merkel.

Angela Merkel Tramp bo‘yicha taassurotlari haqida gapirar ekan, u har doim har qanday vaziyatdan g‘olib chiqishni xohlashini ta’kidladi.

"Muzokaralarda Tramp barcha tafsilotlarni batafsil o‘rganishga katta qiziqish ko‘rsatardi, lekin faqat o‘zining foydasiga yangi dalillarni topishga harakat qilardi", dedi Merkel.

Merkel, shuningdek, bo‘lajak Tramp ma’muriyatining yirik texnologiya korxonalari, xususan, tadbirkor Ilon Mask bilan yaqin aloqalari haqida xavotir bildirdi. Uning ta’kidlashicha, siyosatchilar butun jamiyat manfaatlarini hisobga olishlari kerak va agar ularga xususiy kompaniyalar kuchli ta’sir ko‘rsatsa, bu "barcha uchun yomon bo‘ladi".

^{Foto: EADaily}
Avvalroq Ilon Mask va yana bir tadbirkor Vivek Ramasvami Trampning bo‘lajak administratsiyasida ish boshlashi kutilayotgani ma’lum qilingandi.

"Birgalikda bu ikki ajoyib amerikalik mening ma’muriyatim uchun davlat byurokratiyasini demontaj qilish, ortiqcha qoidalarni, keraksiz xarajatlarni kamaytirish va federal agentliklarni qayta tashkil etish yo‘lini ochib beradi", degan Tramp. “Zamin” yangiliklarini “Vkontakti”da kuzatib boring