Trampning Ukraina bo‘yicha maxsus vakili Kiyevga borishni rejalashtirmoqda

^{Kit Kellog Foto: AP / Andrew Harnik}
AQSHning saylangan prezidenti Donald Tramp Ukraina va Rossiya Federatsiyasi bo‘yicha o‘zining maxsus vakili etib tanlagan iste’fodagi general Kit Kellog yanvar oyi boshida Yevropaning bir qancha poytaxtlariga, jumladan Kiyevga ham tashrif buyurishni rejalashtirmoqda. Bu haqda 17 dekabr, seshanba kuni Reuters axborot agentligi xabar berdi. Unga ko‘ra, Moskvaga tashrif hali Kellogning rejalariga kiritilmagan.

Agentlik suhbatdoshlarining aytishicha, Kellog Kiyevda Ukraina rahbariyati bilan uchrashmoqchi. Bundan tashqari, uning jamoasi Parij va Rimda yuqori martabali siyosatchilar bilan uchrashuvlar tayyorlamoqda. Maqsad Ukrainadagi urushni tugatish bo‘yicha unchalik faol muzokaralar emas, balki AQSHning yangi ma’muriyati uchun ma’lumot to‘plash, deya aniqlik kiritdi Reuters manbalari.

Shuningdek, Kellogning Yevropa bo‘ylab safar rejasi hali ishlab chiqish bosqichida ekanligi va uning asosiy nuqtalari o‘zgarishi mumkinligi xabar qilingan.

AQSH yangi prezidentining inauguratsiyasi 2025 yil 20 yanvarga belgilangan. Reuters suhbatdoshlarining qayd etishicha, Kellogning bundan oldin Yevropaga borish niyati Tramp Ukrainadagi kelishuvga katta ahamiyat berayotganidan dalolat beradi.

AQSHning GFRdagi sobiq elchisi «qiyin» davlatlar bo‘yicha maxsus elchi bo‘ladi

AQSHning saylangan prezidenti Donald Tramp AQSHning Germaniyadagi sobiq elchisi Richard Grenelni «maxsus ishlar bo‘yicha maxsus elchi» etib tayinlashga qaror qildi. U Vashington bilan munosabatlari keskin yoki beqaror bo‘lgan mamlakatlar va mintaqalarga yuborilishi kutilmoqda. «Rik dunyodagi eng qiyin hududlarda, jumladan, Venesuela va Shimoliy Koreyada ishlaydi», — deb yozgan Tramp 14 dekabr kuni Truth Social sahifasida.

U Grenelning kelgusi vazifalarini batafsil tasvirlab bermadi. Prezident Donald Trampning birinchi muddati davomida, 2017 yildan 2021 yilgacha Richard Grenell AQSHning Germaniyadagi elchisi, Serbiya va Kosovodagi tinchlik muzokaralari bo‘yicha prezidentning maxsus elchisi hamda Milliy razvedka direktori vazifasini bajaruvchi lavozimlarida ishlagan.

Saylov kampaniyasi davomida Grenell Trampni faol qo‘llab-quvvatlagan va ko‘pchilik tomonidan AQSH davlat kotibi lavozimiga nomzod sifatida ko‘rilgan. Biroq, bu lavozim oxir-oqibat Floridadan senator Marko Rubioga o‘tadi. Kuzatuvchilarga ko‘ra, Grenellni ishga joylashtirishning yana bir varianti AQSHning Ukraina va Rossiya bo‘yicha maxsus vakili lavozimi bo‘lgan. Biroq bu lavozimga 80 yoshli nafaqadagi general-leytenant Kit Kellog nomzodi ilgari surildi.

AQSH prezidentlari o‘z mamlakatlari vakillari sifatida ko‘pincha ikki tomonlama munosabatlar doirasidan tashqariga chiqadigan, elchixona rahbarlari tomonidan ko‘rib chiqilmaydigan mavzular va inqirozlarga e’tibor qaratishi uchun maxsus vakillarni tayinlaydi, deya eslatadi Reuters. “Zamin” yangiliklarini “Odnoklassniki”da kuzatib boring