Yevropada keksa kishilarni aldagan firibgarlar tarmog‘i fosh etildi

^{Foto: Getty Images}
Germaniya va boshqa mamlakatlar politsiyasi qo‘shma tergov davomida a’zolari keksalarni o‘zlarini salbiy vaziyatga tushib qolgan qarindoshlari sifatida ko‘rsatib, aldab yurgan xalqaro firibgarlik tarmog‘ini fosh qildi. 17 dekabr, seshanba kuni xabar qilinganidek, Frayburg prokuraturasi va Baden-Vyurtemberg federal yeri politsiyasi boshqarmasi tomonidan o‘tkazilgan keng ko‘lamli operatsiya natijasida jami 4 854 500 yevroga yaqin qiymatdagi 400 ta firibgarlik holatlarining oldi olindi.

Qo‘lga olinganlar asosan keksalarga qo‘ng‘iroq qilib, o‘zlarini qarindoshlari sifatida ko‘rsatib, qiyin vaziyatda yordam berish uchun ulardan pul berishni so‘ragan.

Tergovchilar, boshqa narsalar qatorida, firibgarlar va ularning potensial qurbonlari o‘rtasidagi suhbatlarni tinglashdi. Polshada politsiya ushbu noqonuniy faoliyat bilan shug‘ullangan kol-markazni fosh qilishga muvaffaq bo‘ldi va shu tariqa firibgarlarning infratuzilmasini yo‘q qildi. 20 nafar gumondor qo‘lga olindi.

Qayd etilishicha, Yevropol tomonidan qo‘llab-quvvatlangan xalqaro firibgarlik tarmog‘iga qarshi operatsiya noyabr oyi oxirida boshlangan va ikki hafta davom etgan. Unda Avstriya, Vengriya, Germaniya, Luksemburg, Polsha, Slovakiya, Chexiya va Shveysariyadan politsiya xodimlari ishtirok etdi.

Germaniyada operatsiyaga har kuni 1000 nafargacha politsiyachi jalb qilingan. Muvofiqlashtirishni Berlin jinoyat politsiya boshqarmasi va Berlin prokuraturasi amalga oshirdi. Baden-Vyurtembergdagi tergovni Frayburg prokuraturasi va yer jinoiy politsiya idorasi boshqargan. Xalqaro operatsiyaning o‘zi 2023 yilning noyabr oyidan beri uchinchi shunday jarayon bo‘ldi. “Zamin” yangiliklarini “Youtube”da kuzatib boring