Qozogʻistonda qulagan samolyotning "qora quti"si topildi (video)

^{Foto: Reuters}
Azerbaijan Airlines aviakompaniyasining Qozogʻistonda halokatga uchragan samolyotining qora qutisi Aqtauda topildi. U jinoyat ishiga qoʻshib qoʻyiladi. Qozogʻiston huquq-tartibot idoralari aviahalokat sabablarini oʻrganish bilan shugʻullanadi.

“Jinoyat ishi qoʻzgʻatildi va barcha zarur tadbirlar amalga oshirilmoqda. Samolyotning qora qutisi topildi, tergovchilarga topshirildi va u ishga qoʻshiladi”, dedi Qozogʻiston transport prokuraturasi vakili.

Transport vaziri Marat Qaraboevning aytishicha, aviahalokatda jami 38 kishi halok boʻlgan. Samolyot ekipajining besh a'zosidan uch nafari omon qolgan, ikki nafari vafot etgan.

“Yoʻlovchilar haqida: Ozarbayjondan bortda 37 kishi boʻlgan, ulardan 23 nafari halok boʻlgan, 14 nafari omon qolgan. Qirgʻizistondan uch kishi boʻlib, uchovi ham tirik qolgan. Rossiyadan 16 yoʻlovchi boʻlgan, ettitasi halok boʻlgan, toʻqqiz nafari omon qolgan. Qozogʻistondan olti yoʻlovchi boʻlib, afsuski, vatandoshlarimizning barchasi halok boʻlgan”, dedi vazir.

Bosh vazir oʻrinbosari Qanat Bozumbaev halokatning hatto dastlabki sabablarini ham keltirmadi. U samolyotdagi teshiklarning fotosuratlarini koʻrgani va ular oʻq tekkan izlarga oʻxshashini aytdi.

“Tergov-tezkor guruhi allaqachon tashkil etilgan. Men bilan birga sud-tibbiyot ekspertlari va aviatsiya administratsiyamizning mutaxassislari keldi. Transportdagi havo hodisalarini ular tekshiradi. Jinoiy ish doirasida ular ma'lumotlarni toʻplaydi, ekspertizalar oʻtkazadi va qulash sababini aniqlab beradi. Asossiz biror narsa ayta olmayman. Odamlar tarqatayotgan ma'lumotlarni koʻrib chiqdim... Samolyot erga qulab, agʻdarilib ketguncha koʻp narsalar sodir boʻlishi mumkin. Shuning uchun hozircha xulosa chiqarishdan oʻzimni tiyaman”, dedi vazir oʻrinbosari.

Qozogʻistondagi aviahalokat

Bokudan Grozniyga J28243 reysini amalga oshirayotgan Embraer 190 samolyoti 25 dekabr kuni ertalab Qozogʻistonning Aqtau shahrida halokatga uchradi. Dispetcherlar Grozniy va Maxachqal'ada qoʻnishni rad etganidan keyin layner majburiy qoʻnishni amalga oshirishga urindi. Aqtau aeroportiga bir necha kilometr qolganda u qulab tushdi, portlab, yonib ketdi. Burun qismi toʻliq yonib ketgan, dum qismida esa omon qolganlar bor.

Dastlabki ma'lumotlarga koʻra, kamida 29 nafar tirik qolgan yoʻlovchi aynan shu qismda boʻlgan. Ular kasalxonaga olib kelingan. Ozarbayjon prokuraturasi halokat paytida 32 kishi omon qolganini ma'lum qildi, ammo bu yakuniy ma'lumot emas. “Zamin” yangiliklarini “Telegram”da kuzatib boring