Los Anjelesdagi yongʻin boy-u kambagʻalni birlashtirdi (foto)

^{Foto: Woman.ru}
Los Anjelesda 7 yanvarda boshlangan yongʻinlar davom etmoqda. Soʻnggi ma'lumotlarga koʻra, halok boʻlganlar soni 25 taga etdi, yuzlab uylar zarar koʻrdi va 100 mingdan ortiq aholi evakuatsiya qilindi.

Yongʻin mashhur Gollivud yozuvi joylashgan tepaliklarga ham etib borgan. Hozirgi paytda faqat uchta katta yongʻin — Vudli, Olivas va Sanset kabi hududlarda yongʻinlar oʻchirilgan. Biroq yana beshta katta hudud — Peliseyds, Iton, Herst, Lidiya va Kennet kabi joylarda tabiiy ofat tarqalishi davom etmoqda.

Umumiy etkazilgan zarar miqdori hozircha hisoblanmagan, lekin natijalar juda katta raqam boʻlishi kutilmoqda. Kaliforniyadagi uylar seysmik xavf tufayli asosan yogʻochdan qurilgan. Shu va kuchli shamol sababli yongʻinni toʻliq oʻchirishning iloji boʻlmagan.

^{Aktyor Joshua Jeksonning yonib kul boʻlgan uyi
Foto: Woman.ru}
Koʻpchilik bunday ofatdan koʻrilgan katta talafotda Los Anjeles meri Karen Bassni ayblamoqda. Aynan u yongʻin va oʻt oʻchirish xizmatlari xarajatlarini qisqartirgan, shuningdek, yongʻin boshlangan kunning oʻzidayoq shaharni tark etgan. Shu sababli ijtimoiy tarmoqlarda uni oʻz lavozimidan ketishga chaqirganlar ham boʻldi.

^{Los Anjeles meri Karen Bass
Foto: Los Angeles Daily News}
Kaliforniya aholisi yongʻinning halokatli oqibatlari bilan kurashish uchun mustaqil harakat qilishiga toʻgʻri kelmoqda: qoʻshni uylarni oʻchirishda yordam bermoqda, boshpanasidan mahrum boʻlganlarni oʻz uylarida kutib olishga tayyor ekanliklarini aytishmoqda. Soʻnggi besh kun ichida yongʻin taxminan 10 mingta binoni yoʻq qilgan. Los Anjeles va atrofdagi shaharlarda joylashgan mehmonxonalarda joy qolmagan, koʻpchilikning esa ularga toʻlashga sharoiti yoʻq.

^{Megan Markl
Foto: Woman.ru}
Megan Markl va shahzoda Garri oʻz doʻstlarini Montesito shahridagi uylarida kutib olishgan. Hozirda er-xotin Pasadenada birga boʻlib, ehtiyojmandlarga ovqat va kiyim tarqatishda yordam bermoqda. Shuningdek, ular yongʻindan zarar koʻrganlarga yordam yigʻish uchun xayriya fondi tashkil qilgan.

Yongʻinlardan zarar koʻrganlarga yordam bergan mashhurlar orasida Anjelina Joli ham bor. U oʻgʻli Noks bilan birga ehtiyojmandlar uchun oziq-ovqat tarqata boshladi. Shuningdek, u Los Felisda uyida bir nechta insonlarga yashash uchun joy ajratdi.

^{Foto: Woman.ru}
Shuningdek, Jeymi Li Kertis xayriya fondlariga 1 million dollar miqdorda pul yubordi, Sheron Stoun esa kiyim-kechak va oziq-ovqat bilan bir nechta yuk mashinasini aholiga etkazib berdi. Ushbu tashabbusga opa-singil Kardashyanlar ham qoʻshildi.

^{Aktyor Rayan O Nilning uyi yongʻindan keyin
Foto: Woman.ru}
Allaqachon uylarini yoʻqotgan mashhurlar orasida Anna Faris, Adam Brodi, Leyton Mister, Spenser Pratt va Heydi Montag, Jeyms Vuds, Evgeniy Levi, Mayls va Kelli Teller, Jon Gudman va boshqalar bor. Jumladan, Entoni Hopkinsning 6 million dollarlik uyi ham yonib ketdi.

<sup>Koʻngilli yordamchilar punkti
Foto: Woman.ru

Koʻngilli yordamchilar punkti
Foto: Woman.ru</sup>
Tinch okeani Peliseyds hududidagi mashhurlarning uylari ham yongʻin ostida qolgan. U erda Adam Sandler, Ben Afflek, Tom Henks va Stiven Spilberglar xonadoni bor edi.

^{Komik Bill Heyderning uyini yongʻin chetlab oʻtgan
Foto: Woman.ru}
Jeyms Vuds ham Los Anjelesdagi oʻzining hashamatli uyini yoʻqotdi. Mahalliy telekanallardan birida 77 yoshli aktyor koʻz yoshlarini tiyolmay, shunday dedi:

“Bu xuddi doʻzaxga oʻxshar edi. Atrofimizdagi har bir uy yonib ketayotganini koʻrish ayanchli edi”.
Mamlakat prezidenti Jo Bayden Kaliforniyada favqulodda holat e'lon qilgan, koʻplab hududlarda evakuatsiya jarayonlari davom etmoqda. “Zamin” yangiliklarini “Telegram”da kuzatib boring