AQShning saylangan prezidenti Donald Tramp (20 yanvar kuni lavozimga kirishadi) oʻzining hazilomuz kriptovalyutasini ishga tushirdi. Siyosatchi Truth Social va X’dagi akkauntlarida tegishli postlarni e'lon qildi.
$TRUMP (Official Trump) kriptovalyutasining narxi bir sutkadan kamroq vaqt ichida 578 foizga koʻtarilib, savdolarning umumiy hajmi 10 milliard dollardan oshdi. U ishga tushirilganida 4,29 dollar darajasida sotilayotgandi.
$TRUMP tangasi Solana (SOL) blokcheynida ishlab chiqilgan. Memkoin emblemasida Tramp kurashga chaqiriqni ifodalovchi qoʻlni koʻtargan holda tasvirlangan. Bu 2024 yil iyul oyida AQShning sobiq prezidentiga suiqasd uyushtirilgan voqealarga ishora.
Kriptovalyuta ishga tushirilgan paytda 200 million tanga muomalaga kirgan. Biroq ishlab chiquvchilar uch yil ichida tokenlarning umumiy sonini 1 milliardga etkazishni rejalashtirmoqda, deydi The Crypto Times portali.
Memkoin (memecoin) — bu aslida hech qanday fundamental qiymatga ega boʻlmagan va faqat hazil yoki internet memlari asosida yaratilgan kriptovalyutadir. Uning kursi oʻsishi orqali foyda olishni maqsad qilganlar uni sotib oladi. Memkoinlar koʻpincha internetdagi hazil yoki mashhur voqealarga bogʻlangan boʻladi.
Memkoinning eng mashhur namunasi Dogecoin boʻlib, u dastlab bitkoinni parodiya qiluvchi hazil sifatida yaratilgan. Kriptovalyutaning ramzi Shibu Inu zotli it hisoblanadi.
2024 yilda memkoinlar kriptobozorning eng tez rivojlanayotgan sektoriga aylandi va yil boshidan beri ularning umumiy kapitallashuvi 1800 foizdan ziyodga oʻsdi. Tramp bir necha marta kriptovalyutalarni qoʻllab-quvvatlab kelgan.
U kriptovalyutani milliy ustuvorlik sifatida e'lon qiluvchi farmonni imzolashni rejalashtirmoqda. Farmonga barcha davlat idoralari uchun raqamli aktivlarga nisbatan siyosatni qayta koʻrib chiqish va, ehtimol, kriptovalyutalar bilan bogʻliq barcha sud jarayonlarini toʻxtatib qoʻyish toʻgʻrisidagi koʻrsatmani kiritish masalasi muhokama qilinmoqda. “Zamin” yangiliklarini “Telegram”da kuzatib boring
Ctrl
Enter
Xato topdIngizmi
Iborani ajratib Ctrl+Enter tugmasini bosingMavzuga oid yangiliklar
