Tramp suiqasdda uni himoya qilgan tansoqchini Maxfiy xizmat rahbari etib tayinladi

^{Foto: Reuters}

AQShning saylangan prezidenti Donald Tramp oʻzining shaxsiy tansoqchisi Shon Karranni Maxfiy xizmati direktori lavozimiga tayinladi. Bu haqda u Truth Social platformasida yozdi.

Karran oʻzini soyada tutishga harakat qiladi, lekin uni koʻpincha Tramp bilan birga suratga olishadi. Tansoqchi 2024 yil 13 iyul kuni Pensilvaniyadagi saylovoldi mitingida Trampga suiqasd uyushtirilganida uni oʻqdan himoya qilgandi. Oʻshanda tadbir ishtirokchilaridan biri halok boʻlgan, yana bir necha kishi jarohatlangan.

U oʻz hayotini xavf ostiga qoʻyib, mening hayotimni qotilning oʻqidan qutqarib qolish uchun jasorat koʻrsatdi. Ishonchim komilki, Shon Amerika Qoʻshma Shtatlari Maxfiy xizmatini har qachongidan ham kuchliroq qiladi, dedi Tramp.

“Trampga ishonchli odam kerak edi va ular Pensilvaniyadan soʻng, shubhasiz, oʻzaro aloqa oʻrnatishgan”, dedi Jorj Bush va Barak Obama prezidentliklari davrida Maxfiy xizmatning sobiq agenti boʻlgan Bill Geyj.

AQSh prezidentiga koʻra, Shon 23 yillik huquqni muhofaza qilish tajribasiga ega boʻlib, 2001 yilda Maxfiy xizmatdagi faoliyatini Nyuark dala boʻlimida maxsus agent sifatida boshlagan. U erda okrug uchun himoya, razvedka, tergov, xodimlarni yollash va logistik yordam koʻrsatish vazifalarini bajargan.

Mening birinchi muddatim davomida Shon Prezidentni himoya qilish boʻlimining yordamchi maxsus agenti lavozimida ishlagan. U bir nechta himoya qilinadigan shaxslarni bevosita nazorat qilish va ularga mas'ul boʻlish, shuningdek, mening qarorgohlarim uchun xavfsizlik rejalarini takomillashtirish vazifalarini bajargan, dedi Tramp.

Donald Tramp saylov kampaniyasi davomida ikkita suiqasdga urinishga duch keldi

13 iyul kuni Pensilvaniyadagi mitingda siyosatchi qulogʻidan yaralandi, tadbir ishtirokchilaridan biri halok boʻldi, yana ikki kishi jarohatlandi. Jinoyatda gumon qilinayotgan 20 yoshli Tomas 

 Kruksni Maxfiy xizmat yoʻq qildi.

^{Foto: Reuters}