AQSh prezidenti Donald Tramp Ukrainaga Rossiyaga qarshi mudofaa urushiga yordam berish uchun sarflangan “milliardlab dollarlar”ni qaytarib olishni rejalashtirmoqda, deb yozmoqda Daryo nashri.
"Men Ukraina tomoni bizga sarflagan mablagʻlarimiz evaziga biror narsa berishini xohlayman. Shu sababli biz nodir er elementlari va neftni, qoʻlimizdan kelgan barcha narsani soʻrayapmiz", dedi u.
Merilendda boʻlib oʻtgan Konservativ siyosiy harakatlar konferentsiyasida (CPAC) soʻzga chiqqan Tramp Evropa davlatlari Ukrainaga kredit koʻrinishida yordam berganini, Qoʻshma Shtatlar esa bunday qilmaganini, shuning uchun ularga ma'lum miqdorda kompensatsiya toʻlanishi kerakligini ta'kidladi.
"Biz oʻz mablagʻlarimizni qaytarib olmoqchimiz, bu shunchaki adolatsizlik", dedi AQSh rahbari.
Uning fikricha, Vashington va Kiyev foydali qazilmalar boʻyicha “kelishuvga erishishga juda yaqin”. "Biz kelishuvga erishishga yaqinroq boʻlishimiz kerak, chunki bu juda ogʻir vaziyat", deya qoʻshimcha qildi Tramp.
OAV: Zelenskiy hozircha AQSh bilan shartnoma imzolashga tayyor emas
Sky News telekanali prezident Vladimir Zelenskiy mamlakatning nodir er elementlari konlarini oʻzlashtirish huquqini AQShga berish toʻgʻrisidagi bitimni hozirgi koʻrinishida imzolashga tayyor emasligi haqida xabar bergandi.
"Kelishuv hali imzolashga tayyor emas, bir qator muammoli masalalar bor va loyihaning hozirgi koʻrinishida prezident uni qabul qilishga tayyor emas. Bugungi kundagi loyihalar kelishuvdagi sheriklikni aks ettirmaydi va faqat Ukrainaning bir tomonlama majburiyatlarini oʻz ichiga oladi", dedi ukrainalik manba.
AQSh milliy xavfsizlik boʻyicha maslahatchisi Mayk Uols esa kelishuv amalga oshishini aytdi.
"Asosiy xulosa shuki, prezident Zelenskiy bu bitimni imzolaydi va siz buni juda yaqin kelajakda koʻrasiz", dedi u Merilend shtatida oʻtkazilgan konferentsiyada.
AQSh muzokarachilari Ukraina kelishuvga rozi boʻlmagan taqdirda, uning Ilon Maskning hayotiy muhim Starlink sun'iy yoʻldosh internet tizimiga kirishini cheklash imkoniyatini koʻtargani taxmin qilinmoqda.
The New York Times'ning yozishicha, Ukraina Qoʻshma Shtatlardan shartnomaning yangi variantini olgan, biroq undagi ba'zi shartlar 14 fevral kuni AQSh moliya vaziri Skott Bessent tomonidan Kiyevga olib kelingan avvalgi variantdan ham qattiqroq boʻlgan.
Ukraina tomoni hozircha taklif qilingan shartlar asosida kelishuvga rozi boʻlishi yoki boʻlmasligini aytgani yoʻq. Oliy Rada spikeri Ruslan Stefanchukning ma'lum qilishicha, hukumat darajasidagi guruh 24 fevralda kelishuv ustida ishlashni boshlaydi va Ukraina Vashingtonga oʻz resurslariga kirish imkoniyatini berish evaziga aniq xavfsizlik kafolatlarini olishni istaydi.
Ctrl
Enter
Xato topdIngizmi
Iborani ajratib Ctrl+Enter tugmasini bosingMavzuga oid yangiliklar
