Dunyodagi eng mashhur tadbirkorlardan biri Ilon Mask o‘zining X (sobiq Twitter) ijtimoiy tarmog‘ini xAI startapiga sotdi. CNN xabariga ko‘ra, bitimning umumiy qiymati 45 milliard dollar bo‘lib, bunga 12 milliard dollarlik qarz ham kiradi. Buning asosiy maqsadi – platformani sun’iy intellekt texnologiyalari bilan chuqur integratsiya qilishdir.
X va xAI birlashuvi nima uchun muhim?
Maskning so‘zlariga ko‘ra, ushbu kelishuvdan so‘ng X platformasining bahosi 33 milliard dollarga yetadi. U 28 mart kuni o‘z sahifasida:
"xAI va X'ning kelajagi bir-biriga bog‘liq", deb yozdi.
Maskga ko‘ra, bu birlashuv xAI'ning ilg‘or sun’iy intellekt qobiliyatlari va X platformasining keng auditoriyasini birlashtirib, "katta imkoniyatlar eshigini ochadi".
X foydalanuvchilari uchun nima o‘zgaradi?
Hozircha Mask X tarmog‘ida katta o‘zgarishlar bo‘lmasligini aytgan. Lekin sun’iy intellekt texnologiyalari ijtimoiy tarmoqqa allaqachon joriy qilinmoqda.
Ayni vaqtda xAI tomonidan yaratilgan Grok chatboti X'ga integratsiya qilingan. Bu sun’iy intellekt foydalanuvchilarga real vaqtda javob berish, tavsiyalar berish va kontent yaratishda yordam berish kabi funksiyalarni taklif etadi.
Maskning ta’kidlashicha, birlashgan kompaniyalarning umumiy qiymati 80 milliard dollar atrofida bo‘ladi.
Maskning sun’iy intellekt sohasidagi ambitsiyalari
Ilon Mask sun’iy idrok sohasida yetakchi bo‘lishga jiddiy kirishgan. 2024 yil boshida u OpenAI'ni qariyb 100 milliard dollarga sotib olishga urinib, 97,4 milliard dollarlik taklif bergan. Biroq OpenAI direktorlar kengashi bu taklifni rad etdi.
Bu rad javobdan so‘ng Mask sun’iy intellekt sohasida o‘z yo‘lini ochishga qaror qildi va Grok 3 modelini taqdim etdi. Bu sun’iy intellekt chatboti hozirda X tarmog‘i foydalanuvchilari uchun integratsiya qilingan va platformaning asosiy xususiyatlaridan biriga aylanmoqda.
Ilon Maskning X va xAI'ni birlashtirishi sun’iy intellekt texnologiyalarini jamiyat hayotiga yanada chuqurroq joriy qilishga qaratilgan katta qadam hisoblanadi. Yaqin yillarda X ijtimoiy tarmog‘i sun’iy idrok asosida yanada interaktiv va intellektual platformalardan biriga aylanishi mumkin.
Foydalanuvchilar uchun bu yangiliklar yaxshilangan AI funksiyalari, shaxsiylashtirilgan tavsiyalar va intellektual yordamchilarni o‘z ichiga olgan yangi tajribalar taklif etishi mumkin. Ammo sun’iy intellektning keng qo‘llanilishi ma’lumotlar xavfsizligi va axborot maxfiyligi borasida yangi savollarni ham paydo qiladi.
Ctrl
Enter
Xato topdIngizmi
Iborani ajratib Ctrl+Enter tugmasini bosingMavzuga oid yangiliklar
