Tramp: «Ikkinchi prezidentlik muddatimning dastlabki 100 kuni AQSH tarixidagi eng muvaffaqiyatli kunlardir»

AQSH prezidenti Donald Tramp o‘zining ikkinchi prezidentlik muddatining dastlabki 100 kunini «mamlakat tarixidagi har qanday ma’muriyat uchun eng sermahsul kunlar» deb atadi. Bu haqda u Michigan shtatidagi Uorren shahrida o‘z tarafdorlari oldida nutq so‘zlayotganda ma’lum qildi.

Prezident o‘z nutqida asosiy e’tiborni AQSH avtomobil sanoati va iqtisodiy siyosatga qaratdi. Trampning ta’kidlashicha, uning amalga oshirayotgan soliq va bojxona siyosati natijasida mamlakatda avtomobil ishlab chiqarish sanoati yangi bosqichga chiqishi kutilmoqda.

Avvalroq davlat rahbari avtomobil ishlab chiqaruvchilar uchun maxsus soliq imtiyozlarini nazarda tutuvchi farmonni imzolagani xabar qilingan edi. AFP agentligining yozishicha, bu imtiyozlar tufayli butun dunyodan kompaniyalar o‘z zavodlarini Amerika hududida qurish va shu yerning o‘zida avtomobillar ishlab chiqarishga qiziqib qoladi. Mazkur dasturga ko‘ra, AQSHda ishlab chiqarish bilan shug‘ullanayotgan avtomobil kompaniyalari import qismlariga ikki yil davomida chegirmali tariflardan foydalanishi mumkin bo‘ladi.

Shuningdek, avtomobil ishlab chiqaruvchilar xorijda yig‘ilgan avtomobillarga 25 foizlik boj yoki import qilinadigan po‘lat va alyuminiyga 25 foizlik tariflardan birini to‘laydi, xolos.

Uorrendagi uchrashuv vaqtida Tramp yana bir bor yaqin hafta va oylarda o‘z ma’muriyati «Amerika tarixida misli ko‘rilmagan darajada yirik soliq imtiyozlarini» joriy etishga tayyorlanayotganini ta’kidladi. Uning so‘zlariga ko‘ra, Amerika bu orqali «oltin asr»ga qadam qo‘yadi — bu davrda mamlakatda iste’mol narxlari past, maoshlar esa yuqori bo‘lib, «dunyo tarixidagi eng kuchli iqtisodiyot» shakllanadi.

Shunday qilib, Trampning bu bayonoti kelgusi yillarda AQSH iqtisodiy siyosatining yo‘nalishlari va mamlakat avtomobil sanoatida kutilayotgan katta o‘zgarishlardan darak beradi. “Zamin”ni Telegramʻda oʻqing!