Pokiston “ayyor dushman”ga javob zarbasini berdi: Shahboz Sharif Hindistonga nisbatan qat’iy bayonot bilan chiqdi

Janubiy Osiyodagi tortishuv yana keskin tus oldi. Pokiston bosh vaziri Shahboz Sharif 7 may kuni X (sobiq Twitter) ijtimoiy tarmog‘idagi rasmiy sahifasi orqali Hindistonga nisbatan qattiq bayonot bilan chiqdi. Uning so‘zlariga ko‘ra, “ayyor dushman” Pokistonning beshta hududiga “qo‘rqoqlarcha hujumlar” uyushtirgan va bu mamlakat milliy xavfsizligiga qarshi ochiq tajovuz sifatida baholanadi.

«Bizning besh hududimizga qilingan bu qo‘rqoq zarbalarga javob bermaslikning iloji yo‘q. Pokiston Hindiston tomonidan boshlangan bu urush aktiga munosib va qat’iy javob berishga to‘liq haqli. Va bu javob allaqachon berildi», — deya ta’kidladi Sharif.

Bosh vazir shuningdek, bu vaziyat yuzasidan milliy miqyosdagi muhim qarorlarni muhokama qilish uchun Pokiston Milliy xavfsizlik kengashining maxsus yig‘ilishini chorshanba kuni mahalliy vaqt bilan soat 10:00 ga belgiladi.

Pokiston axborot vaziri Attaulla Tarar esa o‘z navbatida mamlakat Havo kuchlari tomonidan Hindistonning ikkita qiruvchi samolyoti va bir droni urib tushirilganini ma’lum qildi. Shuningdek, Kashmirdagi bo‘linish chizig‘i bo‘ylab Hindistonning bir necha postlari, shu jumladan brigadasiga tegishli shtab-kvartira ham nishonga olinib, yo‘q qilinganini iddao qildi.

Biroq, Hindiston armiyasi bu da’volarga javob qaytarmadi va rasmiy munosabat bildirgani yo‘q.

Siyosiy tahlilchilarga ko‘ra, ikki yadroviy davlat o‘rtasidagi bu kabi ziddiyatli bayonotlar mintaqaviy xavfsizlikni jiddiy tahdid ostiga qo‘yadi. Xususan, Kashmir masalasi yillar davomida ikki tomon o‘rtasida ziddiyat o‘chog‘i bo‘lib kelmoqda.

Hozircha mojaro kengayishi yoki diplomatik muzokaralar orqali yumshatilishi noma’lum, ammo vaziyatni diqqat bilan kuzatish va har qanday keskin harakatlarning oldini olish mintaqada tinchlikni saqlash uchun juda muhim hisoblanadi.

Siz bu tortishuv haqida nima deb o‘ylaysiz? Mojaro qanday yo‘nalishda davom etishi mumkin? “Zamin”ni Telegramʻda oʻqing!