Putin Qosim-Jo‘mart To‘qayevga otasiga berilgan Sovet Ittifoqi qahramoni unvoni hujjatini topshirdi

Rossiya prezidenti Vladimir Putin qozog‘istonlik hamkasbi Qosim-Jo‘mart To‘qayev bilan bo‘lgan uchrashuv chog‘ida unga otasi Kemel To‘qayevga Sovet Ittifoqi qahramoni unvoni berilganligi haqidagi rasmiy mukofot varaqasini topshirdi.

“Sizga muhim tarixiy hujjat – otangiz Kemel To‘qayev Sovet Ittifoqi qahramoni unvoni bilan taqdirlanganini tasdiqlovchi mukofot varaqasini topshirishdan mamnunman”, – dedi Vladimir Putin hujjatni taqdim etar ekan.

Qosim-Jo‘mart To‘qayev Rossiya prezidentiga va hukumatiga minnatdorchilik bildirib, ushbu e’tirofning uning oilasi uchun juda katta ahamiyatga egaligini ta’kidladi. Shuningdek, u o‘zining amakisi Rjev yaqinidagi ommaviy qabrda dafn etilganini esga oldi va Putinga Rossiya tomonidan amalga oshirilgan tashabbus – uning surati Rjevdagi rus askariga bag‘ishlangan xotira pannosiga joylashtirilgani uchun alohida minnatdorchilik bildirdi.

Kemel To‘qayev Ikkinchi jahon urushi qatnashchisi sifatida janglarda mardlik va qahramonlik namunalarini ko‘rsatgan. Jang paytida og‘ir jarohat olgan bo‘lsa-da, u davolanishdan keyin frontga qaytib, o‘z xizmatini davom ettirgan. Urushdagi shu og‘ir va jasoratga to‘la yillar uning hayoti va ijodiga ham katta ta’sir o‘tkazgan.

Urush yakunlanganidan keyin Kemel To‘qayev detektiv va sarguzasht janrlarida asarlar yozib, adabiyot olamida keng tanilgan yozuvchiga aylangan. Uning asarlarida urush paytida orttirgan boy hayotiy tajribasi o‘z aksini topgan va ko‘plab kitobxonlarning sevimli muallifi sifatida xalq orasida nom qozongan.

Bunday tadbirlar mamlakatlar o‘rtasidagi do‘stlik va tarixiy munosabatlarning yanada mustahkamlanishiga xizmat qilishi shubhasizdir. “Zamin”ni Telegramʻda oʻqing!