Salmon Rushdiyga pichoq bilan hujum qilgan Jersi Hadi Matar 25 yilga qamaldi

Nyu-York shtatidagi Chautokva okrugi sudi jahonga mashhur britaniyalik yozuvchi Salmon Rushdiyga suiqasd qilishga uringan Jersi Hadi Matarga hukm chiqardi. 27 yoshli Matar 25 yil muddatga ozodlikdan mahrum etildi. Bu haqda The Guardian nashri xabar berdi.

Sud jarayoni 10 fevral kuni boshlangan va 21 fevralda sud hay’ati uni qotillikka uringanlikda aybdor deb topgan.

Advokat va ayblov tomonining bahslari

Matarning advokati Endryu Brotigan suddagi so‘z chiqishida himoyasidagi shaxs Rushdiyni o‘ldirish niyatida bo‘lmaganini va buni isbotlash uchun zarur dalillar yetishmaganini ta’kidladi. Uning so‘zlariga ko‘ra, Matar yozuvchining yurak qismini nishonlamagan va zarbalar hayotiy muhim a’zolarga emas, yuz va bo‘yinga berilgan.

Shu bilan birga, ayblov tomoni Matar tomonidan amalga oshirilgan 10–15 marta pichoq zarbasi o‘limga olib kelish ehtimoli yuqori ekanini ta’kidlab, bunday harakatni to‘liq qotillikka urinish sifatida baholadi.

Suiqasd tarixi: kitob va fatvo

Ma’lumot uchun, 2022 yil avgust oyida Chautokva shahridagi ma’ruzalar markazida o‘tkazilishi kerak bo‘lgan tadbirda Matar saxnaga chiqib, Salmon Rushdiyga hujum qilgandi. U shu paytgacha quvg‘inga uchragan yozuvchilarga boshpana haqida ma’ruza qilishi kerak edi. Ammo tadbir boshlanishidan oldin Matar yozuvchiga tashlanib, 15 marta pichoq bilan zarba bergan. Hujum natijasida Rushdiy o‘ng ko‘zidan ajralgan va turli og‘ir jarohatlar olgan.

AQSH Adliya vazirligiga ko‘ra, Matar ushbu harakati orqali Eron oyatullosi Humayniy tomonidan berilgan va Rushdiyni o‘ldirishga chaqiruvchi fatvoni amalga oshirishga uringan. Ma’lumki, Rushdiy 1980 yillarda yozilgan “Shayton suralari” romani bilan musulmon jamoalarida keskin e’tirozlarga sabab bo‘lgan va Eronda uning o‘limiga fatvo chiqarilgan.

Matar haqida ma’lumot

Jersi Hadi Matar AQSHda Livanlik muhojirlar oilasida tug‘ilgan. U Nyu-Jersida yashab, kiyim-kechak do‘konida ishlagan. Uning onasiga ko‘ra, o‘g‘li oxirgi paytlarda oila bilan aloqani uzgan va ijtimoiy jihatdan yopiq yashagan.

Salmon Rushdiy kim?

Salmon Rushdiy — britan yozuvchisi, 2016 yilda AQSH fuqaroligini olgan. U “Yarim tunda tug‘ilgan bolalar” romani uchun 1981 yilda Buker mukofotiga sazovor bo‘lgan. “Shayton suralari” asari bilan esa butun dunyoda tanilib, bir vaqtning o‘zida bahs va tahdidlarni ham orttirgan.

Zamin.uz tahririyati mazkur voqeaning ijtimoiy va siyosiy ta’sirlarini kuzatishda davom etadi. Siz bu voqeaga qanday baho berasiz? “Zamin”ni Telegramʻda oʻqing!