Ukrainaning qurol xaridida 770 mln dollarlik shubhali sxema aniqlandi

Rossiyaning to‘liq hujumi boshlanganidan buyon Ukraina zudlik bilan katta miqdorda chet el qurollarini xarid qilishga majbur bo‘ldi. Biroq Britaniyaning The Financial Times nashri yozganidek, ushbu jarayon korrupsiya va bajarilmagan shartnomalar tufayli jiddiy muammolarga duch kelgan.

Tahlillarga ko‘ra, Ukraina so‘nggi uch yilda turli davlatlardan qurol va o‘q-dorilar yetkazib berish bo‘yicha 30 ga yaqin oldindan to‘langan shartnomalarni amalga oshira olmagan. Ushbu kelishuvlar uchun mamlakat 770 million dollar miqdorida avans mablag‘ini to‘lagan, lekin qurol yoki umuman yetkazib berilmagan, yoki noto‘liq va sifatsiz holda olingan.

Bu mablag‘ Ukraina mudofaa budjeti uchun katta yuk hisoblanadi — umumiy harbiy xarajatlarning taxminan 10-12 foizini tashkil etadi. Ayniqsa, urush holatida bunday yo‘qotishlar mamlakat xavfsizligi uchun jiddiy xavf solishi mumkin.

Hozirda Ukrainadagi huquqni muhofaza qiluvchi organlar bir necha o‘nlab shubhali shartnomalarni o‘rganmoqda. Ular orasida Mudofaa vazirligining yuqori lavozimdagi shaxslari — Toomas Naxkur va Aleksandr Liyev, shuningdek, «Lvovskiy arsenal» kompaniyasi menejerlari va xorijiy vositachilarning ham nomi tilga olinmoqda.

Maxsus tergov Xorvatiyadan 100 ming dona minomyot minasini sotib olish bo‘yicha kelishuv atrofida aylanmoqda. Ayblovlarga ko‘ra, 12,5 million dollarlik avans pullarini vositachilar boshqa, mutlaqo bog‘liq bo‘lmagan faoliyatlarga yo‘naltirgan.

Ayblanuvchilar esa o‘zlarini oqlagan holda, mamlakat omon qolish uchun har kuni bosim ostida qaror qabul qilayotganini ta’kidlashmoqda.

Zamin.uz tahririyatidan:
Qurol-aslaha ta’minotidagi shubhali harakatlar nafaqat moliyaviy zarar, balki mamlakatning harbiy salohiyatiga ham jiddiy ta’sir ko‘rsatadi. Mazkur holatda aniqlik va javobgarlik ta’minlanishi, har bir tiyin o‘z maqsadiga yo‘naltirilishi shart. Siz bu masala yuzasidan qanday fikrdasiz? Qurol yetkazib berish jarayonlari qanchalik shaffof bo‘lishi kerak? “Zamin”ni Telegramʻda oʻqing!