Qozog‘iston bilan chegarada harakat cheklovi yana uzaytirildi: Sabab nima?

Qozog‘iston va O‘zbekiston chegarasida joylashgan «Tajen» («Dovut Ota») nazorat-o‘tkazish punkti orqali fuqarolar va transport vositalarining o‘tishi bo‘yicha vaqtinchalik cheklovlar yana uzaytirildi. Bu haqda Qozog‘istonning Moliya vazirligi Davlat daromadlari qo‘mitasi rasmiy ma’lum qildi, deb xabar bermoqda Kazinform.

Ma’lum qilinishicha, Qozog‘iston tomoni O‘zbekiston Respublikasining mas’ul davlat organlari bilan kelishgan holda, 3,5 tonnagacha bo‘lgan yengil avtomobillar, avtobuslar va boshqa transport vositalari uchun harakatni to‘xtatish muddatini yana to‘rt oyga — 2025 yilning 1 sentyabriga qadar uzaytirishga qaror qilgan.

Rasmiy bayonotda ta’kidlanishicha, bu cheklov fuqarolar xavfsizligini ta’minlash, shuningdek, nazorat-o‘tkazish punktida amalga oshirilayotgan qurilish, rekonstruksiya va ta’mirlash ishlarining jadallashtirilishi maqsadida qabul qilingan.

Hozirda ushbu obyektda keng qamrovli va jiddiy qurilish ishlari olib borilmoqda. Xususan, metall konstruksiyalar o‘rnatilmoqda, yangi muhandislik kommunikatsiyalari o‘tkazilmoqda, binolar esa kapital ta’mirlanmoqda.

Bundan tashqari, may oyidan avgustga qadar Qozog‘iston tomoni «Tajen» va O‘zbekiston tomoni «Dovut Ota» punktlari o‘rtasidagi neytral hududda zamonaviy talablarga mos keladigan yangi yo‘l qurish ishlarini ham boshlagan. O‘zbekiston hukumati ham ushbu harakatlarni qo‘llab-quvvatlab, o‘ziga tegishli hududda shunga o‘xshash ishlar rejalashtirgan.

Eslatib o‘tamiz, ushbu chegara punktlari orqali 2025 yilning 1 fevralidan boshlab yengil transport vositalari va avtobuslarning o‘tishi qurilish va rekonstruksiya ishlari munosabati bilan vaqtincha to‘xtatilgan edi.

Qozog‘iston tomonining ta’kidlashicha, qurilish ishlarining tugatilishi bilan chegaradan o‘tish jarayoni tezlashadi, fuqarolar va transport vositalari uchun qulaylik yaratiladi hamda xavfsizlik darajasi oshiriladi.

Zamin.uz tahririyati ushbu masala bo‘yicha holatni diqqat bilan kuzatib borib, yangi ma’lumotlarni tezkorlik bilan yetkazishda davom etadi. Chegara punktlaridagi bu kabi modernizatsiya ishlari, sizcha, ikki mamlakat o‘rtasidagi harakatni qanchalik yaxshilay oladi? “Zamin”ni Telegramʻda oʻqing!