Zelenskiy Trampdan Putin bilan qo‘ng‘iroqdan avval nimani so‘ragan edi?

AQSH prezidenti Donald Tramp 19 may kuni Rossiya rahbari Vladimir Putin bilan telefon orqali muloqot qilishidan avval Ukraina prezidenti Vladimir Zelenskiy bilan ham gaplashgani ma’lum bo‘ldi. Bu haqda The Wall Street Journal nashri xabar berdi.

Manbalarning ma’lum qilishicha, Tramp va Zelenskiy qisqacha diplomatik maslahatlashuv o‘tkazishgan. Ukraina yetakchisi, xususan, Rossiya bilan to‘g‘ridan to‘g‘ri 30 kunlik o‘t ochishni to‘xtatish bo‘yicha kelishuv yuzasidan fikr almashishni, shuningdek, Ukraina ishtirokida sammit o‘tkazishni muhokama qilishga chaqirgan.

Zelenskiy so‘zlariga ko‘ra, u Trampdan Ukraina qatnashmasdan Kiyev bo‘yicha hech qanday qaror qabul qilmaslikni so‘ragan:

“Biz uchun bu prinsipial va nihoyatda muhim. Agar Rossiyaning pozitsiyasi bizga mos kelmasa, AQSH buni urushni to‘xtatish istagi yo‘qligining belgisi sifatida baholashi kerak”.

Zelenskiyning ta’kidlashicha, u Rossiyaning keyingi qadamlari bo‘yicha “signallar”ni kutayotganini va AQSHdan yangi sanksiyalar haqida o‘ylashni so‘ragan. Agar Moskva urushni tugatish niyatida bo‘lmasa, sanksiyalar joriy etilishi shartligini aytgan.

Tramp va Putin o‘rtasidagi suhbatdan so‘ng, AQSH yetakchisi yana Zelenskiy, Fransiya prezidenti Makron, Italiya bosh vaziri Jorja Meloni, Finlyandiya rahbari Aleksandr Stubb, Germaniya kansleri Mers va Yevrokomissiya rahbari Ursula fon der Lyayen bilan aloqada bo‘lgan. Ular suhbatda nima muhokama qilgani ochiqlanmagan.

Hozirda Tramp, Zelenskiy va Yevropa yetakchilari o‘rtasida Turkiya, Vatikan yoki Shveysariyada yangi muzokaralar o‘tkazish imkoni ham ko‘rib chiqilmoqda.

Zamin.uz tahririyati bu jarayonlar rivojini diqqat bilan kuzatishda davom etadi. Siz ushbu diplomatik muloqotlardan qanday natijalar kutayapsiz?

Foto: dzen.ru “Zamin”ni Telegramʻda oʻqing!