Tramp minglab migrantlarni Kubadagi Guantanamo qamoqxonasiga yubormoqchi

AQSHda noqonuniy migrantlar muammosi yangi bosqichga chiqmoqda. The Washington Post nashri xabar berishicha, sobiq prezident Donald Tramp ma’muriyati Kubaning Guantanamo harbiy bazasida joylashgan maxfiy qamoqxonaga 9 ming nafarga yaqin noqonuniy migrantni jo‘natishni ko‘zlamoqda.

Ma’lumotlarga ko‘ra, bu qarorni amalga oshirish uchun AQSH rasmiylari migrantlarni dastlab tibbiy ko‘rikdan o‘tkazadi — ularning sog‘lig‘i va ushbu bazada saqlanishiga yaroqli yoki yo‘qligi aniqlanadi. Rejalashtirilayotgan ushbu ko‘chirish jarayonida faqat Amerika qit’asidagi davlatlar fuqarolari emas, balki Yevropa mamlakatlari — Buyuk Britaniya, Fransiya, Germaniya, Italiya, Polsha, Litva, Irlandiya, Belgiya, Niderlandiya, shuningdek, Ukraina va Turkiyadan kelgan yuzlab shaxslar ham bor.

WP manbalari ta’kidlashicha, bu qaror Vashington tomonidan ittifoqchi davlatlar bilan kelishilmasdan amalga oshirilishi mumkin. Bu esa xalqaro miqyosda diplomatik tanqidlarga yo‘l ochishi ehtimolini oshiradi.

Eslatib o‘tamiz, joriy yil boshida Tramp 30 mingga yaqin noqonuniy migrantni Kubadagi ushbu harbiy bazaga yuborish niyati borligini bildirgan edi. Ammo Guantanamo qamoqxonasining imkoniyatlari hali ham savol ostida — u hozirgacha faqat yuzlab mahbuslarni saqlash uchun mo‘ljallangan, harbiylar esa chodirlar yordamida kamida 3 ming nafar qo‘shimcha joy tayyorlay olgan, xolos.

Oq uyning izoh berishicha, ushbu chora Tramp va’da qilgan Amerika tarixidagi eng yirik deportatsiya jarayoniga tayyorgarlikning bir qismi hisoblanadi. Bu orqali mamlakat ichidagi to‘lib ketgan hibsxonalarda joy bo‘shatish ko‘zda tutilgan.

Bu qaror faqat migratsiya siyosati emas, balki inson huquqlari, xalqaro munosabatlar va huquqiy jarayonlar borasida ham jiddiy muhokamalarga sabab bo‘lishi kutilmoqda. “Zamin”ni Telegramʻda oʻqing!