Isroil Tehronga zarba berdi — neft ombori va vazirlikka aviahujum (video)

Yaqin Sharqdagi keskin vaziyat yana bir jiddiy quloch yoydi: 15 iyunga o‘tar kechasi Isroil qiruvchi samolyotlari Eron poytaxti Tehrondagi strategik obyektlarga — Shahron neft saqlash bazasi va Eron mudofaa vazirligi binosiga aviazarbalar yo‘lladi. Bu haqda Tasnim agentligi va xalqaro ommaviy axborot vositalari ma’lum qildi.

Mahalliy manbalarga ko‘ra, ushbu hujumlarda mudofaa vazirligining shtab-kvartirasi asosiy nishon bo‘lgan va ofis binolaridan biriga aniq zarar yetgani qayd etilgan. Hujum ortidan shahardagi asosiy yoqilg‘i ombori — Shahron neft bazasida kuchli yong‘in boshlangan. The New York Times guvohlariga ko‘ra, portlash mahalliy aholiga zilziladek tuyulgan.

Tasnim nashri ma’lumotlariga ko‘ra, ushbu neft omboriga qilingan zarba oqibatida ikkita yoqilg‘i saqlash rezervuari butunlay yongan. Eron neft vazirligi vakillari qutqaruvchilar yong‘inni nazoratga olganini va aholi uchun hech qanday xavf yo‘qligini ma’lum qilishdi. Shu bilan birga, Tehron neftni qayta ishlash zavodida ham yong‘in sodir bo‘lgani haqida xabarlar tarqaldi, biroq rasmiy hukumat tomonidan bu axborot rad etildi.

Keyingi ikki kun ichida Isroil va Eron o‘rtasidagi harbiy to‘qnashuv yanada avj oldi. Isroil armiyasi ma’lumotlariga ko‘ra, 13 iyundan buyon Eron hududiga 150 ga yaqin zarba berilgan. Avvalroq, Isroil yadroviy obyektlar, havo hujumidan mudofaa tizimlari va muhim harbiy infratuzilmaga zarbalar bergan bo‘lsa, so‘nggi ikki kunda energetika obyektlariga, jumladan, gaz va neft omborlariga ham hujumlar yo‘llashni boshladi.

Bunga javoban Eron tomoni ham o‘z reaksiyasini kuchaytirib, Isroilga 200 dan ziyod ballistik raketalar va o‘nlab dronlar yo‘llaganini ma’lum qildi. Qarshi tomonlar o‘rtasidagi qarama-qarshilik juda ko‘p qurbonlarga va katta vayronaliklarga sabab bo‘lmoqda.

Eron rasmiylari 13 iyundagi zarbalar oqibatida 78 kishi, 14 iyun kuni esa Tehrondagi turar joy binoga raketa tushishi natijasida kamida 60 kishi halok bo‘lganini tasdiqladi. Reuters agentligi ma’lumotiga ko‘ra, Isroilda esa Eron zarbalari oqibatida kamida 11 nafar qurbon qayd etilgan, ularning asosiy qismi 15 iyunga o‘tar kechasi qilingan zarbalar paytida halok bo‘lgan.

Hozirda vaziyat o‘ta murakkab. Har ikki davlat ham strategiyaviy obyektlarini himoya qilish va tinimsiz zarbalarga javob berishga harakat qilmoqda. Yaqin Sharqdagi ushbu yangi bosqichdagi to‘qnashuv xalqaro hamjamiyatning jiddiy tashvishiga sabab bo‘lmoqda. “Zamin”ni Telegramʻda oʻqing!