Telefon chaqmoqni tortdimi? Hindistonda erkak halok bo‘ldi

Hindistonning Chxattisgarx shtatida yuz bergan fojiali hodisa yana bir bor tabiat hodisalarini mensimaslik qanday og‘ir oqibatlarga olib kelishi mumkinligini namoyon etdi. Dxamateriya tumanida 30 yoshli Rohit Kumar Sinxa chaqmoq urishi natijasida halok bo‘ldi. Eng achinarlisi, u o‘limidan oldin telefonda gaplashayotgan bo‘lgan.

Ma’lumotlarga ko‘ra, marhum hojatxona qurilishini nazorat qilish maqsadida uydan chiqqan va ayni paytda qo‘lidagi uyali telefoni orqali kim bilandir muloqotda bo‘lgan. Shu zahoti, kuchli yashin tushgan va qurilma portlab ketgan. Bu esa og‘ir jarohatlarga sabab bo‘lgan.

Rohit avval yaqin atrofdagi shifoxonaga yetkazilgan, lekin holatining og‘irligi tufayli uni tezkor ravishda tuman kasalxonasiga olib ketishgan. Afsuski, u shifoxonaga yetib bormasdan yo‘lda vafot etgan.

Marhumning qarindoshlari, u ishdan qaytgach hovlisidagi qurilishni ko‘zdan kechirish maqsadida tashqariga chiqqanini aytishmoqda. Shifokorlarning ta’kidlashicha, mobil telefondagi magnitli elementlar chaqmoqni o‘ziga jalb qilishi mumkin. Elektr razryadi telefonda portlash yuz berishiga sabab bo‘lib, bu esa inson hayotini xavf ostiga qo‘yadi.

Aynan shunday holatlar so‘nggi paytlarda ko‘paygan. Aprel oyida Hindistonning Bixar shtatida ham kuchli yomg‘ir paytida chaqmoq urishi oqibatida 22 kishi halok bo‘lgani xabar qilingan edi.

Mutaxassislar tabiiy balolar paytida, xususan yomg‘ir va chaqmoq vaqtida, ochiq maydonda mobil telefondan foydalanmaslikni qat’iy tavsiya qilmoqda. Elektron qurilmalarning nurlanish xususiyati atmosfera elektr razryadlarini o‘ziga jalb qilishi mumkin va bu o‘lim bilan yakunlanishi ehtimoldan xoli emas.

Har qanday texnologiya imkoniyati ortida ehtiyotsizlik yashiringan bo‘lishi mumkin. Tabiatga qarshi chiqmasdan, unga moslashishni o‘rganish inson hayotini saqlab qolishning eng to‘g‘ri yo‘lidir. “Zamin”ni Telegramʻda oʻqing!