Starship sinovida yana portlash: SpaceX va Ilon Mask Marsga yo‘lda qiyin sinovlardan o‘tmoqda

SpaceX kompaniyasi tomonidan yaratilgan va insoniyatni Marsga yetkazish orzusini olib yurgan Starship kosmik kemasi navbatdagi sinov parvozi paytida yana portladi. 18 iyun kuni Texas shtatidagi Starbase kosmodromida kechayotgan ushbu voqea AQSH va butun dunyoda katta qiziqish uyg‘otdi.

SpaceX'ning rasmiy bayonotida aytilishicha, sinovning statik olov bosqichida — dvigatellar ishga tushirilganda, raketaning birinchi pog‘onasida portlash ro‘y bergan. Kuchli portlash oqibatida ikkinchi pog‘onada yoqilg‘i sizib chiqishi kuzatilgan va natijada butun tizim boshqaruvdan chiqqan. Ta’kidlash joiz, ushbu statik sinovda raketa uchirilmaydi, u maydonda mahkamlangan holda turib, faqat dvigatellar tekshiriladi.

SpaceX va mahalliy rasmiylar hodisadan keyin poligon va uning atrofini xavfsizlashtirish bo‘yicha tezkor choralar ko‘rdi. Jamoatchilikka va jurnalistlarga hech qanday xavf yo‘qligi ma’lum qilindi. Ammo barchaga hududga yaqinlashmaslik qat’iy tavsiya etildi.

Ilon Mask tomonidan boshqarilayotgan SpaceX shirkati bugungacha Starship'ni rivojlantirish uchun milliardlab dollar sarfladi. Ushbu raketaning asosiy maqsadi — insonlarni Marsga, shuningdek, 50 yillik tanaffusdan so‘ng Oyga qaytarishdir. NASA bilan hamkorlikda amalga oshirilayotgan missiya doirasida bu loyiha ilmiy-texnik taraqqiyotda yangi sahifa ochishi kutilmoqda.

Biroq yo‘lda muammolar ko‘p. Starship sinovlarida portlashlar, texnik nosozliklar tez-tez kuzatilyapti. Xususan, bu uchoq yettinchi, sakkizinchi va to‘qqizinchi sinovlarda ham turli avariyalarga uchragandi. Portlashlar sabab AQSH janubi va hatto Karib dengizi hududlarigacha raketa bo‘laklari tushib, aholi orasida tashvish uyg‘otgan.

Shu bilan birga, ushbu muammolarga qaramay, SpaceX o‘z loyihasidan qaytmoqchi emas. Mask va uning jamoasi sinovlar orqali har bir muvaffaqiyatsizlikdan saboq olmoqda. Marsga inson qadam bosishi uchun kerak bo‘ladigan texnologiya va ishonch — aynan shu muvaffaqiyatsiz sinovlardan kelib chiqyapti.

SpaceX'ning oliy maqsadi — insoniyat tarixida yangi sahifa ochish. Bu yo‘ldagi har bir portlash, har bir sindikat, ilg‘or texnologiyalar sari tashlangan dadil qadam hisoblanadi.

Yaqin haftaning o‘zida Starship'ning navbatdagi sinovi e’lon qilinishi kutilmoqda. Insoniyat esa hali oldinda ko‘plab texnik muammolarni yengib o‘tishiga ishonmoqda. “Zamin”ni Telegramʻda oʻqing!