Qo‘shma Shtatlar Eronga nisbatan keng ko‘lamli va samarali harbiy operatsiyani amalga oshirdi va unda Tehronning ehtimoliy yadroviy quroli yo‘q qilindi. Bu haqda AQSH sobiq prezidenti Donald Tramp Truth Social ijtimoiy tarmog‘ida ma’lum qildi.
“Kecha biz “bomba”ni ularning qo‘lidan tortib oldik. Juda katta harbiy muvaffaqiyat! Ularda imkoniyat bo‘lsa, shubhasiz, undan foydalanishardi! Biz kechagi hujum orqali to‘liq g‘alabaga erishdik”, — deya bayonot berdi Tramp.
Mazkur bayonot nafaqat Amerika, balki xalqaro siyosiy doirada ham katta muhokamalarga sabab bo‘ldi. Trampning ta’kidlashicha, ushbu hujum nafaqat strategik ustunlikni, balki yadroviy xavfsizlikni ham ta’minlagan.
Shu bilan birga, AQSH Kongressi Vakillar palatasidagi respublikachi a’zo Tomas Massi ushbu harbiy zarbani mamlakat Konstitutsiyasiga xilof harakat sifatida baholadi. Uning bu fikriga qarshi chiqqan Donald Tramp Massiga qarshi praymerizda uning raqibini qo‘llab-quvvatlashini ma’lum qildi.
E’tiborlisi shundaki, 2025 yilning mart oyida AQSH Milliy razvedkasi direktori Tulsi Gabbard o‘z chiqishida Eronning hozirda yadroviy qurol yaratish harakati mavjud emasligini bildirgandi. Uning ma’lumotlariga ko‘ra, Eron oliy rahbari oyatullo Ali Xomanaiy 2003 yilda to‘xtatilgan yadroviy qurol dasturini qayta tiklash uchun ruxsat bermagan. Shu bilan birga, Gabbard Islom Respublikasining yadro sohasidagi faoliyati jiddiy nazoratda ekanini ta’kidlagan.
Ayni paytda dunyo hamjamiyati ushbu voqealarga yetarlicha e’tibor qaratayotgani, Eron bilan bog‘liq har qanday harbiy va siyosiy harakatlar xalqaro xavfsizlikka ta’sir qilishi mumkinligi ta’kidlanmoqda.
Harbiy amaliyot, siyosiy bayonotlar va xalqaro munosabatlar o‘rtasidagi murakkab manzarada AQSH va Eron o‘rtasidagi ziddiyat yanada murakkablashmoqda. “Zamin”ni Telegramʻda oʻqing!
Ctrl
Enter
Xato topdIngizmi
Iborani ajratib Ctrl+Enter tugmasini bosing Mavzuga oid yangiliklar
