Amerika avtosport olami yana bir qayg‘uli yangilik bilan silkinib ketdi. Taniqli avtopoygachi, 60 yoshli Kris Rashke Yuta shtatidagi mashhur Bonnevill sho‘rxoklarida jahon rekordini o‘rnatishga urinib, hayotdan ko‘z yumdi. Bu haqda rasmiy ma’lumotni Janubiy Kaliforniya xronometraj uyushmasi (SCTA) tarqatdi, deb xabar berdi People nashri.
Ma’lumotlarga ko‘ra, Rashke poyga boshlanishiga ikki yarim mildan ortiq yo‘l bosib o‘tgach, avtomobil ustidan nazoratni yo‘qotgan. Hodisa joyida unga shoshilinch tibbiy yordam ko‘rsatilgan bo‘lsa-da, olingan og‘ir jarohatlar tufayli uning hayotini saqlab qolishning iloji bo‘lmagan.
«Krisga darhol tibbiy xizmat ko‘rsatildi. Ammo afsuski, olingan tan jarohatlari uning hayotini olib ketdi. Hozirda voqea sabablari puxta o‘rganilmoqda», — deyiladi rasmiy bayonotda.
The Guardian ta’kidlashicha, Rashke hayratomuz ravishda 455 km/soat tezlikka yetib borgan. Ammo u aniq qaysi tezlik rekordini yangilashga harakat qilgani rasman ochiqlanmagan. Bu ma’lumot hozircha sir saqlanmoqda.
Bu voqea nafaqat sport olamida, balki butun avtohavasmandlar uchun ham og‘ir zarba bo‘ldi. Chunki Bonnevill sho‘rxoklari yillar davomida yuksak tezlikka intilayotgan poygachilar uchun muqaddas makon sanaladi. Bu tekis va oq sho‘r yuza, dunyo bo‘ylab o‘nlab yangi rekordlarning guvohi bo‘lgan.
Yuta shtatidagi Solt-Leyk-Sitidan 160 km g‘arbda joylashgan ushbu maydon, nafaqat sport, balki kino dunyosida ham alohida mavqega ega — “Mustaqillik kuni” va “Dunyodagi eng tezkor Indian” kabi mashhur filmlar aynan shu yerda suratga olingan.
Kris Rashke nafaqat professional avtopoygachi, balki tezlikni o‘z hayotining ma’nosiga aylantirgan shaxs sifatida eslanadi. Uning orzu va harakatlari, afsuski, sho‘rxokda to‘xtadi. Ammo uning jasorati va yurakdan ishlagan mehri butun avtofanatlar xotirasida abadiy saqlanadi.
Avtopoyga odamlari va muxlislar bu holatdan katta saboq chiqarishi aniq. Yurakni titratuvchi ushbu voqea nafaqat rekordlar ortida qanday xavflar yotganini, balki har bir poygachi hayotida qanchalar fidokorlik borligini yana bir bor namoyon qildi.
