Jahon energetika bozorida yangi sensatsiya paydo bo‘ldi, deb xabar berdi br.com. Britaniyaning nufuzli BP (British Petroleum) kompaniyasi Braziliya sohillari yaqinida so‘nggi chorak asrda kuzatilgan eng yirik neft-gaz konlaridan birini aniqladi. Yangi konga “Bumerang” nomi berildi — u mamlakat janubi-sharqida, Rio-de-Janeyrodan 404 kilometr masofada joylashgan Santos havzasida aniqlangan.
Ma’lumotlarga ko‘ra, neft-gaz konlari Atlantika okeanidagi tuz qatlami ostida joylashgan bo‘lib, BP 2022 yil dekabr oyida kimoshdi savdosida ushbu hududda qazib olish huquqini qo‘lga kiritgan. Kompaniya mutaxassislari 5855 metr chuqurlikda quduq burg‘ilab, 300 kvadrat kilometrdan ortiq maydonda katta zaxiralarni topishga erishdi.
Kashfiyotning yana bir muhim jihati — karbonat angidrid konsentratsiyasining yuqoriligi. Bu ishlab chiqarish jarayonini murakkablashtirishi va qayta ishlash xarajatlarini oshirishi mumkin. BP bu masala bo‘yicha qo‘shimcha laboratoriya tadqiqotlarini olib bormoqda va kon imkoniyatlarini aniqlashga harakat qilmoqda.
Ta’kidlash joizki, “Bumerang” BP uchun 2025 yilda ochilgan o‘ninchi neft-gaz koni hisoblanadi. Kompaniya mutaxassislari faqatgina Braziliyada emas, balki Trinidad, Misr, Meksika ko‘rfazi, Liviya, Namibiya va Angolada ham yangi konlarni kashf etishda davom etmoqda.
Yangi kashfiyot nafaqat Braziliya, balki butun global energetika bozori uchun muhim ahamiyatga ega. Okean ostidagi tuz qatlamlari ostida yashiringan boyliklar va ularni samarali o‘zlashtirish imkoniyati BP'ning ilmiy-texnikaviy salohiyati va xalqaro nufuzini yanada oshirishi kutilmoqda.
Kelgusida kompaniya tomonidan olib borilayotgan qo‘shimcha tadqiqotlar va yangi texnologiyalar yordamida “Bumerang” konidagi qazilmalar ishlab chiqarilishi va bozorga yetkazilishi kutilmoqda. Energetika sohasida bunday yangiliklar raqobat va istiqbollarni yanada kengaytirishi aniq.
