AQSH prezidenti Donald Tramp 15 avgust kuni dunyo siyosiy sahnasida katta ahamiyatga ega voqea ro‘y berishini ma’lum qildi. Uning aytishicha, aynan shu kuni Amerika Qo‘shma Shtatlari hududidagi eng yirik va strategik ahamiyatga ega hududlardan biri – Alyaska shtatida Rossiya prezidenti Vladimir Putin bilan uzoq vaqtdan beri kutilgan uchrashuv bo‘lib o‘tadi. Mazkur xabar 8 avgust, juma kuni, Trampning shaxsiy Truth Social ijtimoiy tarmog‘ida rasman e’lon qilindi.
Tramp o‘z postida quyidagilarni yozdi:
«Men, Amerika Qo‘shma Shtatlari prezidenti sifatida, Rossiya Federatsiyasi prezidenti Vladimir Putin bilan o‘tkaziladigan uzoq kutilgan sammitni e’lon qilaman. U kelasi juma, 2025 yil 15 avgust kuni, Alyaska buyuk shtatida tashkil etiladi. Batafsil ma’lumotlar yaqin kunlarda taqdim etiladi».
Shuningdek, undan bir necha soat oldin Oq uyda jurnalistlar savollariga javob bergan Tramp Rossiya va Ukraina o‘rtasidagi ehtimoliy tinchlik kelishuvi haqida ham fikr bildirdi. Uning ta’kidlashicha, kelishuvda «hududlar almashinuvi» elementlari bo‘lishi mumkin. «O‘zaro manfaatlar yo‘lida ma’lum hududlar almashtiriladi... Nimanidir qaytaramiz, nimanidir almashtiramiz», — dedi u va bu masala yuzasidan yaqin orada aniq muzokaralar o‘tkazilishini qo‘shimcha qildi.
Rossiya prezidenti yordamchisi Yuriy Ushakov ham bu ma’lumotni tasdiqladi. Uning so‘zlariga ko‘ra, ikki davlat yetakchilarining Alyaskadagi sammiti mantiqan to‘g‘ri qaror, chunki Rossiya va AQSH geografik jihatdan yaqin qo‘shni hisoblanadi. RIA "Novosti" xabariga ko‘ra, Ushakov uchrashuvga tayyorgarlik oson kechmasligini, biroq tomonlar bu yo‘nalishda jadal va samarali ish olib borishlarini ta’kidladi.
Ushakov qo‘shimcha qilib, Moskva va Vashington yaqin bir necha kun ichida Alyaskadagi sammitning amaliy va siyosiy parametrlarini ilgari surishga bor kuchini yo‘naltiradi, dedi. «Bu jarayon yengil bo‘lmaydi, biroq biz faol va qat’iyat bilan ishlaymiz», — deya uning so‘zlarini "Interfaks" agentligi keltirdi.
Ma’lumotlarga ko‘ra, Putin va Tramp muzokaralar chog‘ida asosiy e’tiborni Ukrainadagi urushni uzoq muddatli barqaror tartibga solish masalasiga qaratmoqchi. Shuningdek, Alyaskadagi uchrashuvdan so‘ng prezidentlarning navbatdagi muloqoti Rossiya hududida o‘tkazilishi ehtimoli yuqori. «Tegishli taklif allaqachon AQSH prezidentiga yetkazilgan», — dedi Ushakov.
Bu yangilik xalqaro siyosatda katta qiziqish uyg‘otdi. Chunki ikki yirik davlat yetakchilarining yuzma-yuz uchrashuvi nafaqat ikki tomonlama munosabatlarga, balki jahon geosiyosiy vaziyatiga ham ta’sir ko‘rsatishi kutilmoqda.
