Ovozlar soxtalashtirilganmi? Hindistonda siyosiy bo‘ron

Hindistonda muxolifat partiyalari 2024-yilgi umumxalq saylovlari bo‘yicha saylov komissiyasini adolatsizlikda ayblamoqda. Ularning fikricha, saylov jarayonida ovoz o‘g‘irlanishi va boshqa qonunbuzarliklar bo‘lgan. Parlamentda muxolifat a’zolari saylov tizimi yuzasidan munozara talab qilganida majlis to‘xtatib qo‘yildi.

Muxolifat yetakchisi Rahul Gandi saylov komissiyasi ma’lumotlariga asoslanib, ovoz beruvchilar ro‘yxatida yuz minglab soxta yoki takroriy yozuvlar aniqlanganini aytdi. Uning ta’kidlashicha, ayrim manzillarda o‘nlab, hatto yuzlab odam bir xil joyda ro‘yxatdan o‘tgan. Shuningdek, u saylov uchastkalaridagi kamera yozuvlari o‘chirib tashlanganini da’vo qildi.

Saylov komissiyasi va hukmron Bharatiya Janata partiyasi bu ayblovlarni “asossiz” deb rad etdi. Komissiya Gandidan o‘z so‘zlarini isbotlash yoki xalq oldida uzr so‘rashni talab qildi. Hukumat vakillari esa muxolifatni demokratik institutlarni obro‘sizlantirishda aybladi.

Iyunda boshlangan tekshiruvda 6,5 million nom ro‘yxatdan chiqarildi. Komissiya bunga takroriy yozuvlar, vafot etganlar va boshqa shtatlarga ko‘chib ketganlar sabab bo‘lganini aytmoqda. Tanqidchilar esa ko‘plab saylovchilar, ayniqsa migrantlar va ozchilik vakillari, nohaq ro‘yxatdan chiqarilganini ta’kidlamoqda.

Hindiston Oliy sudi hozircha keng ko‘lamli ovoz beruvchilarni chetlatish bo‘yicha dalillar yetarli emasligini aytdi, ammo agar bunday holat isbotlansa, zudlik bilan choralar ko‘rilishini bildirdi.