AQShda sovuq havo ko‘pchilik uchun hashamatga aylanmoqda

So‘nggi yillarda AQShda yoz juda issiq bo‘lyapti. Issiq to‘lqinlar odamlar salomatligiga xavf tug‘diryapti. Shifokorlar har yozda issiqlik urgan bolalar va keksalarni qabul qilishmoqda. Konditsioner esa hayotni saqlab qoluvchi vositaga aylanmoqda.

Ammo millionlab amerikaliklar uni ishlata olmaydi. 2020-yilda 34 millionga yaqin xonadon elektr uchun to‘lov qila olmagan. Ko‘plar elektr to‘lashi uchun oziq-ovqat yoki dori xarajatlarini qisqartirishga majbur bo‘lgan.

Past daromadli oilalar eng ko‘p qiynalmoqda. Ular daromadining o‘n foizini energiyaga sarflaydi, bu o‘rtacha ko‘rsatkichdan ancha yuqori. Shuning uchun ko‘plar konditsionerni faqat eng zarur paytda yoqadi.

AQSh Kongressi tomonidan 1981-yilda tashkil etilgan “Low Income Home Energy Assistance Program” (Liheap) yillik 4,1 milliard dollar bilan millionlab past daromadli oilalarga yordam berib kelayotgan edi. Biroq 2025-yilda dastur xodimlari qisqartirildi va ma’muriyat uni butunlay tugatish rejalarini e’lon qildi. Mutaxassislar bunday qaror yuz minglab oilalar hayoti uchun xavf tug‘dirishini aytmoqda.

Iqlim o‘zgarishi tufayli issiq to‘lqinlar yanada kuchayishi kutilmoqda. Shu sababli energiyaga kirish imkoniyati – odamlar hayoti uchun tobora muhim bo‘lib qolmoqda.