Tramp tariflari noqonuniy deb topildi: endi nima bo‘ladi?

AQSh apellyatsiya sudi Donald Tramp joriy qilgan global tariflarning aksariyatini noqonuniy deb topdi. Ular AQSh savdo qiladigan deyarli barcha davlatlarga nisbatan qo‘llanilgan edi. Sud qaroriga ko‘ra, prezident bu borada o‘z vakolatlarini oshirib yuborgan.

Tariflar 1977 yilda qabul qilingan Favqulodda iqtisodiy vakolatlar qonuniga asoslangan edi. Ammo sud bu qonun prezidentga boj yoki soliqlar joriy etish huquqini bermasligini aytdi. Shu bois Trampning “savdo muvozanati milliy xavfsizlikka tahdid” degan dalili rad etildi.

Shunga qaramay, tariflar 14-oktabrgacha kuchda qoladi. Keyin ular faqat AQSh Oliy sudi boshqa qaror chiqargan taqdirda saqlanib qolishi mumkin. Endi masala Oliy sudda ko‘rib chiqilishi kutilmoqda.

Mutaxassislar bu qaror AQSh iqtisodiyoti va jahon bozoriga ta’sir qilishi mumkinligini aytmoqda. Chunki ko‘plab davlatlar qaror natijasini kutib, AQSh bilan savdoda ehtiyotkor bo‘lishi mumkin. Bu esa iqtisodiy faollikni pasaytiradi.

Agar Oliy sud apellyatsiya qarorini tasdiqlasa, Tramp siyosatining asosiy qismi katta zarba oladi. Agar qaror bekor qilinsa, u prezidentlik vakolatlaridan yanada kengroq foydalanishi mumkin bo‘ladi. Shu sababli bu masala AQSh siyosati va xalqaro savdo uchun juda muhim bo‘lib turibdi.