28 avgust kuni Yaman poytaxti Sanada sodir bo‘lgan halokatli hujum mintaqadagi vaziyatni yanada keskinlashtirdi. Isroil harbiy kuchlari tomonidan amalga oshirilgan havo zarbasi natijasida husiylar bosh vaziri Ahmad G‘aleb ar-Rahaviy va bir qator yuqori lavozimli amaldorlar halok bo‘ldi.
Ma’lumotlarga ko‘ra, zarba hukumat yig‘ilishi o‘tkazilayotgan vaqtda berilgan. Bu paytda Sanadagi husiylar rahbariyati mamlakat siyosati va mudofaa masalalari bo‘yicha muhokamalar olib borayotgan edi. SABA agentligi xabar qilishicha, Isroil armiyasi bir vaqtning o‘zida bir nechta nuqtalarga zarba bergan va ularning barchasida yuqori martabali amaldorlar to‘plangan bo‘lgan.
Reuters agentligi tarqatgan ma’lumotga ko‘ra, halok bo‘lganlar orasida husiylar mudofaa vaziri va bosh shtab qo‘mondoni ham bor. Bu voqea harakatning siyosiy va harbiy tuzilmasi uchun katta yo‘qotish bo‘ldi.
Eslatib o‘tamiz, 25 avgust kuni ham Isroil Sana shahriga zarba bergan, natijada kamida 10 kishi halok bo‘lgan, yana yuzga yaqin odam turli darajada jarohat olgan edi.
Husiylar esa o‘z navbatida Isroilga qarshi doimiy ravishda raketalar va uchuvchisiz dronlar yo‘llab kelmoqda. Ular bu harakatni Falastin xalqini qo‘llab-quvvatlash sifatida ko‘rsatmoqda. Shuningdek, Qizil dengiz va Adan ko‘rfazida harakatlanuvchi xalqaro savdo kemalariga ham hujum uyushtirib kelmoqda.
“Zamin”ni Telegramʻda oʻqing!
