Xitoyning davlat nazoratidagi “Dongfang Electric” kompaniyasi yangi loyihani e’lon qildi: 26 megavatt quvvatga ega dengizdagi shamol turbinasi prototipi o‘rnatilishi rejalashtirilgan. Bu esa uni butun dunyodagi eng kuchli va yirik shamol elektr stansiyasiga aylantirdi.
Mazkur turbina tarmoqqa ulanganidan so‘ng, yiliga 100 million kilovatt-soat elektr energiyasi ishlab chiqarish quvvatiga ega bo‘ladi. Bu hajm esa taxminan 55 ming xonadonni barqaror elektr energiyasi bilan ta’minlash imkonini beradi, ya’ni mamlakatning energiya tizimiga sezilarli hissa qo‘shadi.
Shuningdek, bu shamol turbinasi sekundiga 8 metr va undan yuqori shamol tezligiga ega bo‘lgan dengiz hududlarida samarali va uzluksiz ishlash uchun maxsus mo‘ljallangan. Bu holat, kelajakdagi energiya samaradorligini va ekologik tozalikni ta’minlashga qaratilgan strategik loyiha sifatida ahamiyat kasb etadi.
Yangi stansiya nafaqat Xitoyning energiya resurslarini mustahkamlashga, balki global energiya bozoridagi o‘rnini mustahkamlashga ham xizmat qiladi. Shu bilan birga, u kelajakdagi dengizdagi shamol energiyasini rivojlantirish va yirik ekologik barqaror loyihalar uchun namuna sifatida xizmat qiladi.
“Zamin”ni Telegramʻda oʻqing!
