Rossiya prezidenti Vladimir Putin Xitoyga tashrifini yakunlab o‘tkazgan matbuot anjumanida Ukraina rahbari Volodimir Zelenskiyga qarata yangi chaqiriq bilan chiqdi. Uning so‘zlariga ko‘ra, agar Zelenskiy tayyor bo‘lsa, Moskvaga kelib uchrashishi mumkin. Biroq Putin bunday uchrashuvning ma’nosi bor-yo‘qligini hali ham aniq bilmasligini ta’kidladi va yana Zelenskiy prezidentligining qonuniyligini shubha ostiga oldi.
Eslatib o‘tamiz, bu g‘oya avvalroq Donald Tramp bilan suhbatda ham tilga olingandi. Ammo Zelenskiy “Faqat Moskvada emas” deya javob qaytargan va Putinning taklifini rad etgan edi.
Rossiya rahbari Zelenskiy bilan uchrashishdan bir necha bor bosh tortgan, chunki uni “noqonuniy prezident” sifatida baholagan. Putinning fikricha, Ukrainada yangi saylov o‘tkazilmagani sabab Zelenskiyning legitimligi savol ostida qolmoqda. Ammo Ukraina qonunchiligiga ko‘ra, prezidentlik saylovi faqat harbiy holat yakunlanganidan 90 kun o‘tgach tashkil etilishi mumkin.
Putin nutqidan muhim iqtiboslar
– «Rossiya hech qachon Ukraina xavfsizligi kafolatlarini hududlar evaziga muhokama qilmagan. Kiyev o‘z xavfsizlik tizimini o‘zi tanlash huquqiga ega, ammo bu ish Rossiya hisobidan bo‘lmasligi shart».
– «Biz hech qachon yer uchun emas, balki odamlarning o‘z tilida so‘zlashish va o‘z madaniyatida erkin yashash huquqi uchun kurashmoqdamiz. Rossiya tarkibida qolishni tanlagan xalq irodasini e’tiborga olish kerak, bu – demokratiyaning asosi».
– «Agar Ukraina hukumati hududiy masalalarni hal qilishni xohlasa, avvalo harbiy holatni bekor qilib, referendum o‘tkazishi shart».
– «Agar sog‘lom fikr ustun kelsa, mojaroni tinch yo‘l bilan hal etish bo‘yicha kelishuvga erishish mumkin. Hozir AQSH ma’muriyatining kayfiyati ham shunga yo‘nalganini ko‘ryapmiz. Umid bor, tunnel oxirida yorug‘lik bor. Lekin agar bu yo‘l tanlanmasa, hammasini qurolli yo‘l bilan hal qilishga to‘g‘ri keladi».
Xulosa
Putinning so‘zlari yana bir bor Rossiya va Ukraina o‘rtasidagi murakkab siyosiy vaziyat qanday yorqin qarama-qarshiliklardan iborat ekanini ko‘rsatdi. U bir tarafdan muzokaralarga ochiq ekanini aytsa, ikkinchi tarafdan Zelenskiyning qonuniyligiga shubha qiladi.
“Zamin”ni Telegramʻda oʻqing!
