Portugaliyaning poytaxti Lissabonda yo‘lovchi tramvayi ishtirokida yirik baxtsiz hodisa sodir bo‘ldi. Chorshanba kuni kechqurun tramvaylardan biri katta tezlikda pastga qarab tushib, burilishda binoga urildi. Rasmiy ma’lumotlarga ko‘ra, kamida 16 kishi halok bo‘lgan, yana 20 dan ortiq yo‘lovchi jarohat olgan.
Guvohlarning aytishicha, tramvay birdan nazoratdan chiqib, pastga qarab to‘xtovsiz harakatlangan. Kuchli portlashga o‘xshash ovoz eshitilib, qora tutun ko‘tarilgan. “Odamlar qichqirdi, ko‘pchilik yordamga yugurdi. Juda qo‘rqinchli holat edi”, — dedi hodisani ko‘rgan sayyoh.
Pastki vagonda bo‘lgan yo‘lovchilar ham katta xavf ostida qolishdi. Mahalliy aholi va guvohlar tez yordam yetib kelguncha qutqaruv ishlariga qo‘shilgan.
Hodisa joyiga politsiya va o‘t o‘chirish brigadalari yetib kelib, jabrlanganlarga yordam ko‘rsatdi. Hukumat voqea qurbonlari xotirasiga milliy motam kuni e’lon qildi. Mutaxassislar esa halokat sabablarini aniqlash bo‘yicha tekshiruv boshlagan.
“Zamin”ni Telegramʻda oʻqing!
