Rossiyaga tegishli Mi-8 harbiy vertolyoti Finlandiya ko‘rfazidagi Vayndlo oroli yaqinida Estoniya havo hududini buzgani ma’lum qilindi. Estoniya armiyasi qo‘mondonligi 8 sentyabr, dushanba kuni Tallinda tarqatgan bayonotida qayd etilishicha, mazkur hodisa 7 sentyabr kuni tushga yaqin sodir bo‘lgan.
Ma’lumotlarga ko‘ra, vertolyot Boltiq dengizi ustidagi Estoniya havo hududiga kirib, taxminan 4 daqiqa davomida qolgan va bu jarayonda havo harakatini nazorat qiluvchi xizmatlarni xabardor etmagan. Bu esa qo‘shni davlatlar o‘rtasida keskin munosabatlarga sabab bo‘ldi.
O‘z navbatida, Estoniya Tashqi ishlar vazirligi Rossiyaning mamlakatdagi muvaqqat ishlar vakilini chaqirib, rasmiy tarzda norozilik notasini topshirdi. Bo‘lim rahbari Margus Saxkna bu holatni «yana bir jiddiy va achinarli voqea», shu bilan birga «xalqaro huquq me’yorlarining ochiqdan-ochiq buzilishi» sifatida baholadi.
Estoniya TIVning ta’kidlashicha, bu holat joriy yilda Rossiya tomonidan amalga oshirilgan havo hududi buzilishining uchinchi holati hisoblanadi. Xususan, 13 may va 22 iyun kunlari ham shunga o‘xshash voqealar sodir etilgan. Shuningdek, avgust oyi yakunida Estoniya hududida harbiy uchuvchisiz uchoqqa tegishli parchalar ham topilgan edi.
Mutaxassislar fikricha, bunday voqealar Yevropa Ittifoqi va NATOga a’zo bo‘lgan mamlakatlar xavfsizligi uchun jiddiy tahdid hisoblanadi. Bu esa mintaqa xavfsizligida yanada keskinlik yuzaga keltirishi mumkin.
Rossiya vertolyotining Estoniya havo hududini buzib kirishi ikki davlat o‘rtasidagi munosabatlarni yanada tortishuvli holatga olib keldi. Estoniya tomoni bunday xatti-harakatlarni qabul qilib bo‘lmaslikni ta’kidlamoqda va xalqaro huquqni hurmat qilishga chaqirmoqda. Bu esa Yevropa mintaqasidagi siyosiy va harbiy muvozanatga jiddiy ta’sir ko‘rsatishi mumkin.
