AQSH prezidenti Donald Tramp o‘zining Truth Social ijtimoiy tarmog‘ida Rossiyaga qarshi yangi va qattiq sanksiyalar haqida bayonot berdi. Uning ta’kidlashicha, bunday cheklovlar faqat NATOga a’zo barcha davlatlar roziligida amalga oshirilishi mumkin. Shu bilan birga, Rossiya neftini sotib olishdan to‘liq voz kechish zarurligiga urg‘u berdi.
Trampning fikricha, ayni paytdagi vaziyatda Rossiyadan neft sotib olish Shimoliy Atlantika ittifoqining Rossiya-Ukraina mojarosini hal qilishdagi pozitsiyasini kuchsizlantirmoqda. Shu sababli, u barcha a’zo davlatlarni bu masalada qat’iy pozitsiya egallashga chaqirdi.
Prezident shuningdek, Xitoydan keladigan mahsulotlarga yuksak bojlarni joriy etish orqali urushning qisqa muddat ichida yakunlanishi mumkinligini ta’kidladi. Uning so‘zlariga ko‘ra, agar NATO birgalikda Xitoy tovarlariga 50 foizdan 100 foizgacha bo‘lgan boj to‘lovlarini kiritsa, bu urushni to‘xtatishda hal qiluvchi omil bo‘ladi.
«Agar shunday choralar ko‘rilsa, urush tez orada tugaydi va minglab insonlarning hayoti saqlanib qoladi. Aks holda, mening vaqtim, shuningdek, Amerika Qo‘shma Shtatlarining vaqti, energiyasi va mablag‘lari behuda sarflanadi», — deb yozdi Donald Tramp.
Shu bilan birga, u bojlar Rossiya va Ukraina o‘rtasidagi to‘qnashuv tugagach, to‘liq bekor qilinishi mumkinligini ham qo‘shimcha qildi. Trampning bayonoti xalqaro maydonda katta qiziqish uyg‘otdi va uning g‘oyalari jamoatchilik orasida keng muhokama etilmoqda.
“Zamin”ni Telegramʻda oʻqing!
