Xitoyda innovatsion texnologiyalar bilan bog‘liq noxush voqea sodir bo‘ldi. Bloomberg nashri tarqatgan xabarga ko‘ra, Chanchun shahrida o‘tkazilgan havo namoyishlari mashqlari paytida ikki uchar mashina o‘zaro to‘qnashib ketdi.
Ma’lumotlarga qaraganda, mazkur qurilmalar mamlakatdagi eng yirik elektr avtomobillari ishlab chiqaruvchilaridan biri — Xpeng Inc. kompaniyasi tomonidan yaratilgan. Bu hodisa havo makonida yangi texnologiyalarni qo‘llash xavfsizligi haqida jiddiy savollarni kun tartibiga olib chiqdi.
Tafsilotlarga ko‘ra, to‘qnashuvdan so‘ng uchish-qo‘nish imkoniyatiga ega elektr vositalaridan biri yonib ketgan. Ikkinchi uchar avtomobil esa shoshilinch holatda xavfsiz qo‘nishga muvaffaq bo‘lgan. Hodisa vaqtida halokat yoki og‘ir jarohat haqida ma’lumot berilmagan bo‘lsa-da, mutaxassislar bunday holat kelgusida qaytarilmasligi uchun jiddiy tahlil va choralar ko‘rilishi shartligini ta’kidlashmoqda.
Aslida, Xpeng Motors bir necha oy avval 2026 yilgacha ommaviy ishlab chiqarishni yo‘lga qo‘yish rejalarini e’lon qilgan edi. Kompaniyaning ta’kidlashicha, yangi turdagi uchar vositalarning boshqaruv tizimida sun’iy intellekt texnologiyalari keng qo‘llaniladi. Bu esa pilotsiz parvozlar imkoniyatini yaratishi, yo‘lovchilar uchun esa qo‘shimcha qulaylik va xavfsizlikni ta’minlashi rejalashtirilgan.
Ayni paytda, Xitoyda mazkur turdagi vositalarga buyurtma berish imkoni mavjud. Biroq ularning ommaviy ishlab chiqarilishi va keng miqyosli sotuvi 2026 yildan boshlanishi kutilmoqda. Shunga qaramay, Chanchunda sodir bo‘lgan mazkur voqea jamoatchilik orasida yangi texnologiyalar xavfsizligi borasida bahs-munozaralarga sabab bo‘ldi.
“Zamin”ni Telegramʻda oʻqing!
