Xitoy yana bir bor dunyo miqyosidagi injenerlik mo‘jizasi bilan e’tiborni o‘ziga qaratdi. Guychjou muzofotidagi tog‘li hududda tarixdagi eng baland va eng katta osma ko‘prik tantanali ravishda ishga tushirildi. Ushbu gigant inshoot nafaqat mamlakat aholisi, balki butun dunyo muhandislari va sayyohlarini hayratga soldi.
Xuatszyan darasini kesib o‘tuvchi ushbu ko‘prik qurilishiga uch yilu to‘qqiz oy vaqt sarflangan. Loyiha uchun 2 milliard yuan, ya’ni taxminan 280 million dollar mablag‘ yo‘naltirilgan. Yangi ko‘prikning qurilishi tufayli oddiy yo‘lda ikki soat davom etgan safar endi atigi ikki daqiqada amalga oshadi. Bu nafaqat vaqt, balki transport xarajatlarini ham sezilarli darajada tejashga xizmat qiladi.
Inshootning asosiy qismi 1420 metr uzunlikka ega bo‘lib, qo‘shimcha qismlari bilan birga umumiy uzunligi qariyb 2890 metrga yetgan. Ko‘prikning balandligi esa haqiqiy rekord — poydevoridan to Beypanszyan daryosi ustidan o‘tgan qismigacha 625 metrni tashkil etadi. Bu ko‘rsatkich mashhur San-Fransiskoda joylashgan «Oltin darvoza» ko‘prigidan deyarli to‘qqiz baravar baland.
Ushbu ko‘prik to‘liq po‘lat fermalardan qurilgan va murakkab tog‘li hududda barpo etilgani bois muhandislar uchun katta sinov bo‘ldi. Shunga qaramasdan, ular zamonaviy texnologiyalar va tajribalardan foydalanib, dunyodagi eng mustahkam va estetik jihatdan ham ajoyib ko‘prikni yaratishga muvaffaq bo‘lishdi.
Guychjou muzofoti ko‘priksozlik markazi sifatida tanilgan. Bu yerda oldin ham dunyodagi eng baland ikki ko‘prik qurilgan. Hozirgi paytda muzofot hududida 30 mingdan ortiq turli ko‘priklar mavjud. Ya’ni, bu hudud haqli ravishda «ko‘priklar vatani» deb atalishi mumkin.
