Filippinda sodir bo‘lgan 6,9 magnitudali zilzila oqibatida halok bo‘lganlar soni 30 kishiga yetdi, deb xabar tarqatdi ABS-CBN News. Rasmiy ma’lumotlarga ko‘ra, ofatdan jabrlanganlar orasida 37 nafar fuqaro turli darajada tan jarohati olgan.
Favqulodda yordam markazi bildirishicha, halok bo‘lganlarning jasadlari Sebu provinsiyasidagi Bogo shahar kasalxonasiga keltirilmoqda. Hodisadan keyin mamlakatda favqulodda holat rejimi kuchaytirilgan.
Ma’lumotlarga ko‘ra, zilzila San-Remijio munitsipalitetidagi sport va sog‘lomlashtirish majmuasining qulashiga sabab bo‘lgan. Mahalliy aholining bir qismi vayronalar ostida qolgani aytilmoqda. Hozirda qutqaruvchilar tomonidan keng ko‘lamli qidiruv va evakuatsiya ishlari olib borilmoqda.
Mutaxassislar qayd etishicha, ushbu zilzila mintaqa uchun so‘nggi yillarda kuzatilgan eng kuchli silkinishlardan biri bo‘ldi. Hukumat qurbonlar oilasiga ta’ziya izhor etib, jabrlanganlarga zarur tibbiy va moddiy yordam ko‘rsatilishini ma’lum qildi.
Shu bilan birga, qidiruv-qutqaruv jarayoni hali davom etayotgani uchun halok bo‘lganlar soni yana ortadi, degan xavotir ham bildirilmoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
