Putin 73 yoshda: uning ehtimoliy o‘g‘illari haqidagi kitob shov-shuvi...

Rossiya prezidenti Vladimir Putinning tavallud kuniga to‘g‘ri kelib, bir qator OAV uning ehtimoliy o‘g‘illariga oid ismlar va fotosuratlarni oshkor etdi. Kecha 73 yoshni qarshi olgan davlat rahbari haqida yangi ma’lumotlar jurnalistlar Roman Badanin va Mixail Rubinning «Shoh(sar)ning o‘zi» nomli kitobi orqali jamoatchilikka taqdim etildi, deb yozadi «Agentstvo».

Nashr ma’lumotlariga ko‘ra, Putin va sobiq gimnastikachi Alina Kabayevaning Ivan va Vladimir ismli ikki o‘g‘li bor, rasmiy hujjatlarda esa ular Spiridonov familiyasi bilan qayd etilgan — bu taxminan prezidentning bobosi Vladimir Spiridonovich Putin nomi bilan bog‘lanadi. Iddaolarga ko‘ra, bolalar oshkoralikdan yiroq tarzda yashaydi, ko‘p vaqtini Valdaydagi prezident qarorgohida o‘tkazadi. Ular uchun alohida saroy, dam olish majmuasi, sayr bog‘i barpo etilgani, har biriga shaxsiy mashina-haydovchi va prezident qo‘riqlash xizmati xodimlari biriktirilgani aytilmoqda.

Mualliflar ta’kidlashicha, Putinning turli familiyalardan foydalanadigan boshqa farzandlari ham tilga olinadi: birinchi nikohidan qizlari — Tixonova va Voronsova, shuningdek, ommaviy axborot vositalarida Rozova nomi bilan mashhur bo‘lgan nikohsiz qizi. OAV ma’lumotlariga ko‘ra, u bir muddat Fransiyada Elizaveta Rudnova nomi bilan yashab, Parijdagi galereyada ishlagan.

Rasmiy manbalar esa hozircha faqat ikki nafar qizning mavjudligini tan olib keladi; Kreml tomonidan yangi da’volar yuzasidan rasmiy tasdiq yoki izoh berilmagan. Shu bois ushbu ma’lumotlar ayni paytda jurnalistik surishtiruvlar va manbalar bayonotiga tayanadi, mustaqil tarzda to‘liq tekshirilmaganini eslatib o‘tamiz.

Prezidentning tavallud kuni arafasida e’lon qilingan kitob va fotolar Rossiya ommaviy muhokamasida yangi to‘lqin ko‘tardi: shaxsiy hayot daxlsizligi va jamoat manfaati o‘rtasidagi muvozanat, shuningdek, mamlakat yetakchisining oilaviy hayotiga doir savollar yana kun tartibiga chiqdi. Qanday bo‘lmasin, rasmiy bayonotlar paydo bo‘lmas ekan, mavzudagi har qanday ma’lumotga tanqidiy yondashuv saqlanishi maqsadga muvofiq.