Moskvada Rossiya prezidenti Vladimir Putin va Suriya muvaqqat rahbari Ahmad al-Shara o‘rtasida tarixiy uchrashuv bo‘lib o‘tdi. Bu ikki siyosatchining ilk muloqoti bo‘lib, u ikki yarim soat davom etgan. Uchrashuvda ikki davlat o‘rtasidagi uzoq yillik hamkorlik, yangi Suriyaning rivojlanish istiqbollari va Rossiyaning bu jarayondagi roli muhokama qilingan.
Suriya rahbari Ahmad al-Shara muzokaralar davomida Rossiyaning yangi siyosiy va iqtisodiy tuzilmalarni shakllantirishdagi yordamiga yuqori baho bergan. Uning ta’kidlashicha, Moskva har doim Damashq uchun strategik hamkor bo‘lib kelgan va kelgusida ham bu yo‘nalishdagi munosabatlar mustahkamlanishi kutilmoqda.
Shu bilan birga, Kreml matbuot kotibi Dmitriy Peskov brifingda jurnalistlarning “Putin va al-Shara Asad taqdiri haqida gaplashdimi?” degan savoliga javob berishdan bosh tortdi. Uning so‘zlariga ko‘ra, hozircha Asadning kelajagiga oid masalalar bo‘yicha rasmiy izoh berilmaydi.
Eslatib o‘tamiz, dekabr oyida Rossiya hokimiyatdan ag‘darilgan Suriyaning sobiq prezidenti Bashar Asad va uning oilasiga boshpana bergan edi. Germaniyaning Zeit nashri ma’lumotlariga ko‘ra, Asad hozir oilasi bilan Moskva Sitida yashaydi va vaqtining ko‘p qismini video o‘yinlar o‘ynashga sarflaydi.
Tahlilchilarning fikricha, bu uchrashuv Suriyadagi yangi siyosiy tuzumning shakllanishi va Moskva ta’sirining yanada oshishiga ishora qiladi. Kreml Asad masalasida sukut saqlayotgan bo‘lsa-da, Rossiya mintaqadagi asosiy o‘yinchi sifatida o‘z mavqeini mustahkamlab bormoqda.
Shunday qilib, Putin va al-Shara uchrashuvi Suriyaning yangi siyosatida muhim burilish nuqtasi sifatida baholanmoqda, Asad esa hozircha siyosiy sahnadan uzoqda, lekin diqqat markazida qolmoqda.
“Zamin”ni Telegramʻda oʻqing!
