Besh soatlik maxfiy uchrashuv va yangi rejalar
Chorshanba kuni tongda Kremlda Ukrainadagi urushni tinch yo‘l bilan hal etish bo‘yicha Rossiya va AQSH o‘rtasidagi muzokaralar jarayoni o‘tkazildi. Uchrashuv qariyb besh soat davom etdi va Toshkent vaqti bilan taxminan 02:30 da yakunlandi. Rossiya tomonidan Vladimir Putin, uning yordamchisi Yuriy Ushakov qatnashgan bo‘lsa, AQSHdan prezidentning maxsus vakili Stiven Uitkoff va Donald Trampning kuyovi Jared Kushner ishtirok etgan.
Putinning salbiy munosabati va "katta ish"
Yuriy Ushakovning ma’lum qilishicha, Moskvaga AQSHning dastlabki «tinchlik rejasi»dan tashqari yana to‘rtta hujjat taqdim etilgan. Ushakov Vladimir Putin Vashingtonning qator takliflariga nisbatan «tanqidiy, hatto salbiy munosabatda» ekanini yashirmaganini aytdi. Uchrashuvda «aniq hududiy masalalar» ham muhokama qilingan.
"Hozircha murosa varianti topilmadi. Biroq amerikaliklar tayyorlagan ayrim takliflar to‘liq rad etilmaydi, ma’lum ma’noda qabul qilinishi mumkin. Demak, ish davom etadi", – deya ta’kidladi Ushakov.
Shunga qaramay, u delegatsiyalar uchrashuvini juda «foydali, konstruktiv va mazmunli» deb atadi. "Tinchlik uzoqlashmadi. Biroq ham Vashingtonda, ham Moskvada hali juda katta ish oldinda turibdi", – dedi u.
Kremldagi sir va Kiyevning kutishi
Ushakovning alohida qayd etishicha, suhbat «butunlay yopiq, maxfiy» shaklda o‘tgan va uning barcha tafsilotlari ochiqlanmaydi. AQSH vakillari Trampga «shaxsan» hisobot beradi, shundan so‘ng keyingi muhokamalar uchun Moskva bilan aloqaga chiqishadi.
Ukraina prezidenti Volodimir Zelenskiy esa ayni paytda urushni tugatish shartlari bo‘yicha «oson yechimlar» kutmayotganini yozdi. Uning so‘zlariga ko‘ra, Kiyev AQSH delegatsiyasining Rossiyadagi muzokaralaridan keyingi signallarini kutyapti. «Keyingi harakatlar aynan mana shu ma’lumotlarga bog‘liq bo‘ladi», – dedi Zelenskiy va Tramp bilan uchrashuv ehtimolini ham rad etmadi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
