Hindiston hukumati mamlakat fuqarolarining barcha smartfonlariga Sanchar Saathi ilovasini olib kirishni talab qilmoqda. Ma’lumotga ko‘ra, Apple, Samsung, Xiaomi va boshqa dunyoga mashhur smartfon ishlab chiqaruvchilari kelgusi 90 kun ichida bu ilovani nafaqat yangi, balki foydalanilayotgan smartfonlarga ham o‘rnatishga majbur bo‘ladi. Bu haqda 1 dekabr kuni Hindiston Matbuot axboroti byurosi (PIB) tomonidan e’lon qilingan bayonotda aytilgan.
Hokimiyat vakillarining ta’kidlashicha, mazkur chora kiberjinoyatchilik va firibgarlikka qarshi kurashish, shuningdek fuqarolarni davlat faoliyati haqida xabardor qilish uchun zarur. Sanchar Saathi ilovasi smartfonlardan o‘g‘irlangan yoki yo‘qolgan telefonlarni aniqlash va bloklashga yordam beradi. Shu bilan birga, foydalanuvchilar ushbu ilova orqali yo‘qolgan 700 mingga yaqin mobil telefondagi ma’lumotlarni tiklashga muvaffaq bo‘lgan.
Hindiston muxolifati va huquq himoyachilari bu yangi talabni keskin tanqid qilib, uni konstitutsiyaga zid deb atadi. Ular hukumatning Sanchar Saathi ilovasi orqali fuqarolar ustidan kuzatuv o‘rnatishni niyat qilishiga xavotir bildirmoqda.
Reuters agentligiga ko‘ra, Apple o‘z smartfonlariga bu davlat ilovasini oldindan o‘rnatish to‘g‘risidagi talabni bajarishni rejalashtirmayapti. Shu bilan birga, kompaniya Nyu-Dehli hukumatini o‘z xavotirlari bilan xabardor qilishni rejalashtirmoqda.
Ushbu talablarga rioya qilish mamlakatdagi texnologik innovatsiyalar va davlat siyosatining yangi bosqichini boshlaydi. Ammo ushbu yo‘nalishdagi qarorlar yangi muammolarni ham keltirib chiqarishi mumkin, chunki bu fuqarolarning shaxsiy hayotiga ta’sir ko‘rsatish ehtimoli bor.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
