AQSH prezidenti Donald Tramp ham Rossiyadan, ham Ukrainadan "juda norozi" ekanini bildirib, ular o‘rtasidagi harbiy mojaroning imkoni boricha tezroq tugashini istayotganini ma’lum qildi. Bu haqda 11 dekabr, payshanba kuni Oq uy matbuot kotibi Kerolayn Livitt bayonot berdi.
Trampning sabri tugadi
Kerolayn Livittning ta’kidlashicha, AQSH rahbari "faqat uchrashuv uchun o‘tkaziladigan uchrashuvlardan" (ya’ni, samarasiz muloqotlardan) bezor bo‘lgan.
Livitt: "Endi u gap-so‘zlarni emas, harakatlarni istaydi, bu urushning tugashini xohlaydi. Faqat so‘nggi bir necha hafta ichida AQSH ma’muriyati rossiyaliklar, ukrainaliklar va yevropaliklar bilan 30 soatdan ortiq vaqt sarfladi".
Uning qo‘shimcha qilishicha, AQSH hukumati har ikki jang qilayotgan tomon bilan ishlashni davom ettiradi.
Parij uchrashuvi: AQSH shart qo‘ymoqda
13 dekabr kuni Parijda Germaniya, Buyuk Britaniya, Fransiya va Ukraina vakillari ishtirokida muhim uchrashuv bo‘lib o‘tadi. AQSHning ushbu yig‘ilishda qatnashishi yoki qatnashmasligi haqidagi savolga Oq uy matbuot kotibi ochiq javob berdi:
"Agar tinchlik kelishuvini imzolash uchun real imkoniyat paydo bo‘lsa, agar bu uchrashuvlar Qo‘shma Shtatlar uchun shu dam olish kunlarida sarflangan vaqtga arziydi, deb his qilsak, unda biz o‘z vakilimizni yuboramiz".
Germaniya kansleri Fridrix Mers avvalroq Ukraina qaysi hududiy imtiyozlarga borishga tayyor ekani haqidagi takliflar AQSH prezidentiga yetkazilganini aytgan edi. Trampning o‘zi esa bu muloqotda "keskin so‘zlar" bo‘lganini ta’kidladi va "Biz qarorni ular qaysi natija bilan qaytib kelishiga qarab qabul qilamiz. Biz vaqtni bejizga sarf qilmoqchi emasmiz", — dedi.
Zelenskiy: Ikki asosiy tortishuv nuqtasi
O‘z navbatida, Ukraina prezidenti Volodimir Zelenskiy 11 dekabr kuni jurnalistlar bilan uchrashuvda AQSH bilan muzokaralarda hamon tortishuvli bo‘lib qolayotgan ikki asosiy bandni sanab o‘tdi:
1. Donesk viloyati hududi va u bilan bog‘liq barcha masalalar.
2. Rossiya qo‘shinlari tomonidan bosib olingan Zaporijjya atom elektr stansiyasining kelajakdagi maqomi .
Zelenskiyning so‘zlariga ko‘ra, AQSH Ukraina Qurolli kuchlariga ular nazoratida qolib turgan Donesk viloyati qismidagi pozitsiyalardan chiqishni va mamlakat sharqida demilitarizatsiya qilingan maxsus iqtisodiy zona yaratishni taklif qilmoqda. Shu bilan birga, AQSH loyihasiga ko‘ra, Rossiyaga Donesk, Xerson va Zaporijjya viloyatlarida qo‘shin qoldirishga ruxsat beriladi, ammo Dnipropetrovsk, Xarkiv va Sumi viloyatlarini tark etish majburiyati yuklanadi.
Ukraina rahbari hududga tegishli har qanday imtiyozlar masalasi butun xalq muhokamasiga qo‘yilishi kerakligini ta’kidladi: "Bu saylov orqali bo‘ladimi yoki referendum orqalimi — baribir, bu holda ukrain xalqining pozitsiyasi ifoda etilishi kerak".
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
