Yevropa Ittifoqi Ukrainaga yordam berish uchun Rossiyaning muzlatilgan aktivlaridan foydalanmoqchi bo‘lyapti, bu Moskva tomonidan keskin e’tiroz uyg‘otdi. Yevropa Ukrainaga keyingi ikki yilda zarur bo‘lgan mablag‘ni aynan Rossiya aktivlari hisobidan qoplamoqchi. Rossiya bu rejani “o‘g‘irlik” deb atab, sudga murojaat qildi.
Rossiyaning Yevropadagi 210 milliard yevro (taxminan $230 mlrd) aktivlari muzlatilgan, aksariyati Belgiyadagi Euroclear bankida saqlanadi. Yevropa Komissiyasi ushbu aktivlardan Ukrainaga kredit ko‘rinishida 90 milliard yevro (taxminan $99 mlrd) ajratishni taklif qilmoqda. Ukraina prezidenti Vladimir Zelenskiy bu mablag‘lar Rossiya vayron qilgan infratuzilmani tiklashga ishlatilishini “adolatli” deb hisoblaydi.
Belgiya bu reja tufayli moliyaviy xavf ostida qolishidan xavotirda. Belgiyalik rasmiylar Rossiya javob choralarini ko‘rsa, zarar aynan Belgiyaga tushishi mumkinligini aytmoqda.
Shuningdek, Yevropa Ittifoqi ichida ham masala bo‘yicha yakdil fikr yo‘q. Ba’zi davlatlar Rossiya aktivlaridan foydalanishni qo‘llab-quvvatlasa, boshqalar huquqiy xavf tug‘dirishi mumkinligini bildiradi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
