AQSH Prezidenti Donald Tramp Amerika qo‘shma shtatlari hududiga kirish butunlay man etilgan mamlakatlar ro‘yxatini sezilarli darajada kengaytirdi. Oq uy tomonidan seshanba, 16 dekabr kuni e’lon qilingan rasmiy hujjatga ko‘ra, 2026 yil 1 yanvardan e’tiboran kuchga kiradigan yangi cheklovlar 20 ta davlat va hududni qamrab oladi. Shu tariqa, Vashington tomonidan qo‘llanayotgan ushbu choralar doirasi ikki baravarga ortdi.
To‘liq taqiq ostidagi davlatlar
Yangi farmonga muvofiq, quyidagi mamlakatlar fuqarolari uchun AQSH darvozalari to‘liq yopiladi:
- Burkina-Faso, Laos, Mali, Niger, Suriya, Serra-Leone va Janubiy Sudan.
Shuningdek, Falastin milliy ma’muriyati tomonidan berilgan yo‘l hujjatlari (pasportlari) egalariga ham Amerikaga kirish taqiqlanadi.
Qisman cheklovlar joriy etilgan mamlakatlar
AQSH ma’muriyati xavfsizlik talablari va ma’lumot almashish tizimidagi kamchiliklar sababli yana qator davlatlarga nisbatan qisman cheklovlar o‘rnatdi:
- Angola, Antigua va Barbuda, Benin, Gabon, Gambiya, Dominikan Respublikasi, Zambiya, Zimbabve, Kot-d’Ivuar, Malavi, Mavritaniya, Nigeriya, Senegal, Tanzaniya va Tonga.
Rasmiy bayonotda ta’kidlanishicha, ushbu keskin choralar shaxsni tekshirish va terrorizmga qarshi axborot almashish jarayonlarida doimiy muammolarga ega davlatlarga nisbatan qaratilgan.
Turkmaniston uchun "Yengillik"
Vashington Turkmaniston fuqarolari uchun muayyan imtiyozlar taqdim etdi. Xususan, noimmigratsion vizalar bo‘yicha cheklovlar bekor qilindi. Biroq, immigratsion vizalar berilishini to‘xtatib turish o‘z kuchida qoldi. Bu qaror Ashxobodning AQSH bilan shaxsni aniqlash tizimlarini takomillashtirish borasidagi "samarali hamkorligi" natijasi sifatida baholanmoqda.
Tarixiy jarayon: Tramp va Bayden siyosati
Donald Tramp o‘zining ilk prezidentlik davrida ham Kuba, Eron, Liviya, Shimoliy Koreya, Somali va Yaman kabi davlatlarga taqiq qo‘ygan edi. Jo Bayden hokimiyatga kelgach, bu qarorlarni bekor qilgandi.
Biroq, Oq uyga qaytgan Tramp 2025 yil iyun oyida cheklovlarni yana tikladi. O‘shanda Afg‘oniston, Hayiti, Myanma va Kongo kabi 19 ta davlat ro‘yxatga olingandi. E’tiborli jihati, o‘sha paytda na Shimoliy Koreya, na Suriya bu ro‘yxatdan joy olmagan edi.
Donald Tramp bayonoti: "Biz kirish taqiqini qayta tiklaymiz va radikal terrorchilarning mamlakatimizga kirishiga aslo yo‘l qo‘ymaymiz. Bu chora avval ham AQSHda teraktlarning oldini olishda o‘ta muvaffaqiyatli bo‘lgan."
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
