Yevropa Chempionlar ligasi va Fransiya chempionatining amaldagi g‘olibi “Pari Sen-Jermen” klubi Kilian Mbappe bilan bog‘liq sud tortishuvida yana majburiy ijro choralariga duch kelishi mumkin. Sud qarorlariga ko‘ra, klub futbolchi tomoniga 60 million yevrodan ortiq mablag‘ to‘lashi kerak edi. Biroq “Real Madrid” hujumchisining vakillari aytishicha, shu summa ichida hali ham 2 million yevro yetishmay turibdi. Ayni paytda Mbappening yuridik jamoasi qolgan mablag‘ni majburiy tarzda undirish bo‘yicha ish olib borayotgani aytilmoqda.
PSJ va Mbappe o‘rtasidagi bu moliyaviy mojaro 2025 yil dekabr oyidagi sud qarori ortidan yanada chuqurlashgan. Klub qarzning katta qismini qoplagan bo‘lsa-da, aynan 2 million yevrolik “farq” sabab futbolchi tomoni yana qat’iy pozitsiyani ushlab turibdi. Xabarlarga ko‘ra, Mbappening advokatlari zarurat tug‘ilsa, sud ijrochilarini klubning ma’muriy ofislariga yuborish ehtimolini ham chetga surmayapti.
Nizo Parij sanoat sudi qarori bilan bog‘liq. Sud PSJni Mbappega jami 60 million yevro to‘lashga majbur qilgan. Ushbu summa to‘lanmagan maoshlar, imzo bonuslari va foizlarni o‘z ichiga oladi. Dastlab parijliklar 55 million yevroni o‘tkazgan, keyin ijro organlari aralashuvidan so‘ng yana 4 million yevro qo‘shgan. Ammo futbolchi tomonining da’vosiga ko‘ra, yakuniy 2 million yevro hali ham to‘liq yopilmagan.
Shu bilan birga, PSJ o‘z majburiyatlarini to‘liq bajarganini ta’kidlamoqda. Klub pozitsiyasiga ko‘ra, bahsli tafovut soliqlar va ijtimoiy sug‘urta badallari bilan bog‘liq texnik hisob-kitoblardan kelib chiqqan.
Bu tortishuv PSJ uchun oddiy hisob-kitobdan ko‘ra kengroq ma’no kasb etyapti — jamoatchilik oldidagi obro‘ masalasiga aylanib qolgan. Ayrim xabarlarga ko‘ra, klub sud qarorining to‘liq matnini rasmiy sayti bosh sahifasida bir oy davomida e’lon qilish majburiyatidan qochish uchun Mbappe bilan kelishuvga kelmoqchi. Ammo futbolchi tomoni na 2 million yevrodan, na e’lon majburiyatidan voz kechish niyatida emas.
Sud qarorining moliyaviy tafsilotlari
Sud Mbappening oylik yalpi maoshini 11,8 million yevro deb belgilagan. Qarorda quyidagi to‘lovlar ko‘rsatilgan:
• 36,6 million yevro — imzo bonusining uchinchi qismi;
• 3,6 million yevro — ta’til puli;
• 17,2 million yevro — 2024 yil aprel, may va iyun oylari uchun maosh;
• 1,7 million yevro — shu davr uchun ta’til puli;
• 1,5 million yevro — “etika bonusi”;
• 150 ming yevro — unga bog‘liq ta’til to‘lovi;
• 5 ming yevro — sud xarajatlari.
Sud, shuningdek, PSJning “Mbappe 2023 yilda tarkibdan chetlatilgan paytda bonuslardan o‘z ixtiyori bilan voz kechgan” degan da’volarini rad etgan. Bu esa futbolchi foydasiga chiqarilgan ikkinchi mustaqil qaror sifatida qayd etilayotgani aytilmoqda.
Qisqasi, PSJ bu ishni “texnik masala” deyishi mumkin, ammo Mbappe tomoni uchun bu — prinsip. Endi eng qiziq nuqta: klub qolgan 2 millionni qanday shaklda yopadi va bu tortishuv yana qay darajagacha borib yetadi.
“Zamin”ni Telegramʻda oʻqing!
