25-fevral, chorshanba kuni AQSH prezidenti Donald Tramp Kongressning ikkala palatasi oldida millatga an’anaviy murojaati bilan chiqish qildi. O‘z boshqaruvining bir yillik sarhisobini o‘tar ekan, Tramp mamlakat hech qachon ko‘rilmagan darajada kuchli va boy davlatga aylanganini alohida g‘urur bilan ta’kidladi.
"Amerikaning oltin asri" va iqtisodiy zafarlar
Prezident o‘z nutqida ichki siyosatdagi yutuqlarga to‘xtalib, inflyatsiyaning jilovlanishi va yonilg‘i narxlarining tushishini o‘z ma’muriyatining asosiy xizmati deb bildi. Trampning ta’kidlashicha, AQSHga 18 trillion dollardan ortiq investitsiya olib kirilgan, biroq mustaqil ekspertlar va Oq uy saytidagi ma’lumotlar bu raqamlar biroz bo‘rttirilgan bo‘lishi mumkinligini ko‘rsatmoqda.
Shuningdek, davlat rahbari xorijiy tovarlarga joriy etilgan bojlarni qo‘llab-quvvatladi va kelgusida bu tizim aholi to‘laydigan daromad solig‘ini butunlay almashtirishi mumkinligiga shama qildi.
Tashqi siyosat va urushlarni tugatish va’dasi
Tramp tashqi siyosatda isroillik garovga olinganlarni ozod etilishini va "sakkizta urushga chek qo‘yganini" o‘z yutug‘i sifatida sanab o‘tdi. Rossiya-Ukraina nizosining to‘rt yilligiga to‘g‘ri kelgan nutqida u urushni to‘xtatish uchun keskin choralar ko‘rilayotganini aytdi. Shu bilan birga, u yana bir bor: "Agar men hokimiyatda bo‘lganimda, bu urush hech qachon boshlanmas edi", deya ta’kidladi.
Kongressdagi keskinlik va namoyishlar
Prezidentning bir yarim soatlik nutqi murosasiz bahslar va noroziliklar ostida o‘tdi. Demokratlar Trampning migratsiya haqidagi so‘zlarini hushtakbozlik bilan kutib olishdi. Majlis boshlanishidan avval esa demokrat El Grin irqiy haqoratlarga qarshi plakat ko‘tarib chiqqani uchun zaldan chiqarib yuborildi.
Kongress binosi oldida esa yuzlab namoyishchilar Trampning siyosatiga qarshi shiorlar bilan to‘planishdi. Ular prezidentni migrantlarga nisbatan qattiqqo‘llikda va Rossiya rahbariyati bilan yaqinlikda ayblab, "Tramputin" kabi kinoyali shiorlarni ko‘tarib chiqishdi.
Sizningcha, Trampning iqtisodiy islohotlari va bojxona siyosati jahon bozoriga qanday ta’sir ko‘rsatadi?
“Zamin”ni Telegramʻda oʻqing!
