Vashington Eron neftini to'liq o'zlashtirish va shu orqali Tehronni asosiy daromad manbaidan mahrum qilish niyatida ekanligini ma'lum qildi. Bu haqda Amerikaning energetika ustunligi bo'yicha milliy kengashi direktori Jarrod Eygen Fox News telekanali efirida aytib o'tdi.
Jurnalistlarning Yaqin Sharqdagi ziddiyatlar neft narxiga qanday ta'sir qilishi haqidagi savoliga javob berarkan, Eygen Ho'rmuz bo'g'ozidagi muammolardan xavotirlanmaslik kerakligini ta'kidladi. Uning so'zlariga ko'ra, AQSh Eron rahbariyati qo'lidan barcha neftni tortib olishni rejalashtirmoqda.
Shu hafta davomida Eron dunyodagi eng muhim neft tranziti yo'nalishlaridan biri hisoblangan Ho'rmuz bo'g'ozi amalda yopilganini e'lon qildi. Ushbu taqiq barcha turdagi kemalarga, xususan, tijorat va neft tashuvchi tankerlarga ham tegishli bo'ldi. Natijada strategik ahamiyatga ega bo'lgan yo'lakda harakat deyarli to'xtab qoldi, ayrim kemalar esa raketa zarbalariga nishon bo'lmoqda.
Soha mutaxassislarining fikricha, neft oqimlarini nazorat qilish uchun borayotgan kurash mintaqadagi geosiyosiy ziddiyatlarning asosiy qismiga aylanib ulgurgan. Fors ko'rfazidan amalga oshiriladigan neft eksportidagi har qanday uzilish jahon energetika bozorlari hamda yoqilg'i narxlariga o'zining jiddiy ta'sirini ko'rsatishi shubhasiz.
“Zamin”ni Telegramʻda oʻqing!
